PINAGSASAKSAK hanggang mamatay ang isang mister ng kanyang nakaaway sa Caloocan City, Huwebes ng madaling araw.
Namatay habang ginagamot sa Jose Rodriguez Memorial Hospital si Romeo Lucasan, 59-anyos, ng Phase 9, Bagong Silang ng lungsod, dahil sa mga tinamong saksak sa katawan.
Nadakip naman ang suspek na si Michael Viado, nasa hustong gulang at taga-Phase 8-A, Bagong Silang.
Batay sa ulat, dakong alas-2:00 ng madaling araw, isinasara ni Lucasan ang gate-valve ng tubig sa labas ng kanilang bahay nang sumulpot ang suspek at pinagsasaksak ang biktima.
Matapos ang insidente ay mabilis na tumakas ang suspek subalit nasakote ng mga barangay tanod.
Isinugod naman ang biktima sa nasabing pagamutan ngunit binawian din ng buhay.
Inaalam na ng mga pulis ang tunay na motibo sa pananaksak sa biktima.