TARAK sa mukha ang dahilan kung bakit tuluyan nang namahinga ang isang trike driver matapos saksakin ng hindi nakikilalang lalaki sa loob ng kanyang traysikel habang natutulog sa Quezon City kaninang madaling-araw, Pebrero 4.

Bagama’t sugatan, nakahingi pa ng tulong ang biktimang si Sixto Calastre, 36, alyas Onyo, sa isang gasoline boy na hindi nakuha ang pangalan pero namatay din habang nilalapatan ng lunas sa pagamutan.

Blangko naman ang Quezon City Police District-Criminal Investigation and Detection Unit (QCPD-CIDU), kung sino ang nasa likod ng pamamaslang pero isa sa sinisilip na motibo’y resbak ng isang kaaway nito.

Sa ulat ng CIDU, naganap ang insidente alas-3 ng madaling-araw sa isang gasoline station sa may Sct. Alcaraz St., Bgy. Sacred Heart, Q.C.

Ayon sa ayaw magpakilalang cashier ng naturang gasolinahan, karaniwan nang natutulog ang biktima sa loob ng kanyang traysikel na ipinaparada sa kanilang gasolinahan.

Pero laking gulat niya kaninang madaling-araw nang biglang lumapit sa kanya ang biktima na duguan at may nakabaong kutsilyo sa mukha.

Nakita naman ng ilang testigo ang isang nagngangalang Jose Sañano na nakasakay sa bisikleta at nanggaling sa nasabing gasolinahan ilang minuto matapos ang insidente. ROBERT TICZON

ANIM na construction worker ang nasugatan nang gumuho ang pinatutuyong semento mula sa isang itinatayong bagong Condominium sa Bonifacio Global City (BGC) kahapon ng umaga sa Taguig City.

Kasalukuyan pang inaalam ng mga awtoridad ang pagkakakilanlan ng mga biktimang pawang mga isinugod sa St. Luke’s Hospital sanhi ng mga tinamong minor injuries.

Sa inisyal na ulat na natanggap ni S/Supt. Arthur Felix Asis, hepe ng Taguig City Police, alas- 8:20 ng umaga nang maganap ang insidente sa isang bahagi ng ikapitong palapag ng isang ginagawang condominium na “The Suite” sa kanto ng 5th at 28th Ave., BGC ng naturang lungsod.

Napag-alamang bagong buhos pa lamang umano ng semento sa isang bahagi ng nabatid na ginagawang condominium nang bigla umano itong bumigay hanggang sa tuluyan nang gumuho na nagresulta sa pagkakasugat ng anim na construction worker.

Dahil dito, agad na isinugod sa nabatid na pagamutan ang mga sugatang obrero upang mabigyan ng paunang lunas.

Ayon kay Asis, inaalam pa nila kung ang gumuho ay bahagi ng flooring o biga mula sa ginagawang gusali.

Nagpatupad naman ng mahigpit na seguridad ang pulisya sa naturang lugar dahil nagkakagulo ang mga tao nang maganap ang insidente. JAY REYES

PERSONAL na nagtungo sa himpilan ng pulisya ang isang 12-anyos na dalagita upang magsampa ng reklamo laban sa isang manyakis na tricycle driver na umano’y nangmolestiya sa kanya kung saan pinagamit muna siya ng iligal na droga bago siya ginahasa sa Makati City.

Nagsasagawa ng manhunt operation ang mga tauhan ng Makati City Police laban sa suspek na nakilalang si Edrian Mendoza, nasa hustong gulang, ng 4040 Gen. Luna St., Bgy. Cembo, Makati City makaraang ireklamo ng panggagahasa ng biktimang itinago sa pangalang “Christina.”

Sa isinumiteng ulat kay S/Supt. Ernesto Barlam, Officer-In-Charge (OIC) ng Makati City Police, noong Enero 15 ng taong kasalukuyan naganap ang panggagahasa ng suspek sa biktima sa isang bahay sa Bgy. Guadalupe Nuevo ng naturang lungsod.

Nauna rito, inimbitahan umano ng suspek ang biktima sa isang bahay at pumayag naman ang biktima dahil magkakilala naman umano sila.

Ayon sa biktima, pinagamit muna siya ng suspek ng shabu at nang makaramdam umano siya ng pagkabangag ay sinamantala umano ito ng suspek hanggang sa halayin na siya.

Aniya pa, hindi niya kaagad sinabi sa kanyang ina ang insidente dahil pinagbantaan pa umano siya ng suspek na kapag nagsumbong ay may masama mangyayari dito.

Matapos matanggap ang reklamo ay kaagad na nagsagawa ng follow-up operation ang mga kagawad ng Makati City Police laban sa suspek subalit nang puntahan sa tinitirhan nito Mendoza ay hindi na mahagilap pa.

Patuloy na iniimbestigahan ng mga awtoridad ang nabatid na insidente. JAY REYES

PROBLEMA umano sa pamilya ang dahilan ng pagpapakamatay ng isang 21-anyos na lalaki kaninang madaling-araw sa Intramuros, Maynila.

Isinugod pa sa Ospital ng Maynila ang biktimang si Mark Borbon, walang trabaho, ng 452 Cabildo St., Intramuros, Manila.

Sa report ni PO3 Crispino Ocampo ng Manila Police District (MPD)-homicide section, dakong 1:30 ng madaling-araw nang natagpuang patay ang biktima sa loob ng kanilang bahay gamit ang isang tali.

Nauna rito, nagising sina John Clark Laguna at Maricris Borbon, pamangkin at pinsan ng biktima at nakita itong nakabitin sa kanilang kisame.

Agad namang silang humingi ng tulong sa kapitbahay upang maibaba ang biktima ngunit patay na rin ito.

Inaalam na kung may naganap na foul play sa pagkamatay nito. JOCELYN TABANGCURA-DOMENDEN

PATAY ang dalawang construction workers habang 11 pa nilang kasamahan ang nasugatan nang gumuho ang pinatutuyong semento mula sa upper ground floor ng isang itinatayong Condominium sa Bonifacio Global City (BGC) kahapon ng umaga sa Taguig City.

Dead-on-the-spot ang mga biktimang sina Renan Dela Cruz at Ruben Rakrakan, kapwa nasa hustong gulang, matapos madaganan ng pinatuyong semento.

Ginagamot naman sa Saint Luke’s Medical Center ang nasa 11 sugatan na pawang mga construction worker sa nasabing gusali na kinilalang sina Aldrin Gahuman, Jaymar Carbeta, Sandy Vargas, Roberto Lorca, Regan Labmutin, Larry Magguray, Wendel Behim, Darwin Amara, Bernard Tugade, Jonathan Agoson at Delinger Abara.

Sa inisyal na ulat na natanggap ni S/Supt. Arthur Felix Asis, hepe ng Taguig City Police, alas-8:20 ng umaga nang maganap ang insidente sa isang bahagi ng ikapitong palapag ng isang ginagawang condominium na “The Suite” sa kanto ng 5th at 28th Ave., BGC ng naturang lungsod.

Ayon kay Asis, bumigay ang pinatutuyong semento at ang scaffolding na pinagtutungtungan ng mga biktima habang ang mga ito’y gumagawa sa nasabing gusali.

Napag-alaman namang posibleng managot ang contractor sa naturang insidente at kapag napatunayang nagkaroon ang mga ito ng kampabayaan ay sasampahan ang mga ito ng kaukulang kaso.

Sa ngayon ay patuloy na iniimbestigahan ng pulisya ang naturang insidente. JAY REYES

BAYAMBANG, PANGASINAN – Patay ang isang magsasaka matapos barilin ng dalawang hindi pa nakikilalang lalaking lulan ng motorsiklo sa Bgy. Maigpa, Bayambang sa nasabing lalawigan kahapon, Pebrero 4.

Dead-on-the spot ang biktimang si Nazareno Lamsen, na nagtamo ng isang tama ng bala ng baril sa ulo.

Ayon sa pulisya, nakaupo ang biktima sa gilid ng kalsada malapit sa kanilang bahay nang lapitan ito ng mga suspek na naka-motosiklo, kung saan bumunot ng baril ang backride saka tinarget sa ulo ang biktima.

Samantala, isang Bernabe Caranto naman na kausap ni Lamsen ng mga oras na iyon ang binaril din sa katawan.

Agad na tumakas ang mga suspek matapos ang insidente habang nakarekober ang awtoridad ng empty shells ng .45 pistol mula sa pinangyarihan.

Pinaghahanap na ngayon ang mga suspek at inaalam na rin kung anong motibo sa krimen. ALLAN BERGONIA

PINAGHAHANAP ng mga tauhan ng Manila Police District (MPD) ang isang barangay kagawad at kasamahan nito matapos paluin ng dos-por-dos sa ulo at barilin hanggang sa mapatay ang isang 38-anyos na pedicab driver kaninang madaling-araw sa Tondo, Maynila.

Binawian ng buhay habang ginagamot sa Metropolitan Hospital ang biktimang si Joel Sunga, 38, ng 1482 F. Ma. Guerrero St., Tondo, Maynila na nagtamo ng tama ng bala sa katawan at sugat sa ulo.

Nakilala naman ang tumakas na suspek na sina Rex Mallari, ng 1416 F. Ma. Guerrero St., Tondo, at Sherwin Herosa, barangay Kagawad ng Bgy. 243 Zone 22.

Ayon kay SPO3 Glenzor Vallejo ng Manila Police District-homicide section, naganap ang insidente alas-2 ng madaling-araw sa panulukan ng F. Ma. Guerrero at Mayhaligue St., Tondo.

Sa imbestigasyon, nag-iinuman ang biktima at suspek nang magkaroon ang mga ito ng hindi pagkakaunawaan.

Upang makaiwas sa gulo ay minabuti ng biktima na umalis na lamang subalit sinundan ito ng Kagawad na si Herosa at pinalo ng dos-por-dos sa ulo saka binaril ng kanyang kasamahang si Mallari.

Mabili na tumakas ang dalawa habang isinugod naman ang biktima sa naturang ospital subalit namatay din makalipas ang ilang minuto.

Patuloy naman tinutugis ng pulisya ang dalawang suspek. JOCELYN TABANGCURA-DOMENDEN

NASUNOG ang QC Central Post Office sa NIA Road, kaninang madaling-araw, Pebrero 5.

Sumiklab ang apoy sa mismong records section ng post office na nasa ikalawang palapag ng gusali.

Tumagal nang halos 30-minuto ang sunog na umabot sa ikatlong alarma. Alas-6:03 ng umaga nang ideklara itong fireout.

Ayon kay F/Supt. Jesus Fernandez ng QC-BFP, posibleng nagkaroon ng short circuit ang isa sa mga saksakan na nasa records section.

Hindi naman inabot ng sunog ang unang palapag ng gusali na pinag-iimbakan ng mga sulat.

Tuloy naman ang pasok ng mga empleyado sa records section dahil pwede silang mag-opisina sa ibang tanggapan.

Inaalam pa ng awtoridad ang halaga ng natupok. ROBERT TICZON

PATAY ang isang 3-anyos na lalaki matapos mahagip ng isang nag-overtake na Sport Utility Vehicle (SUV), habang tumatawid kasama ang kanyang ina at kapatid sa  Sampaloc, Maynila.

Kinilala ang biktimang si Julius Jacobe, ng 2257 Int. Felipa St., Sampaloc, Maynila.

Sa report ng Manila Police District-Police Station 4, hawak umano ng ina ang biktima at isa pa nitong anak habang tumatawid sa kalsada alas-4 ng hapon.

Pagsapit sa center island ay may isang motorsiklo papalapit sa kanila nang biglang nag-overtake ang isang Isuzi IPV (WRX-396) na minamaneho ni Alfredo delos Santos, 51, ng 22 Botocan St., Araneta Ave., QC dahilan para mahagip ang  biktima.

Gumulong pa umano ang biktima bago nasagasaan ng SUV ni Delos Santos.

Agad namang naisugod ang paslit sa United Doctors Medical Center subalit idineklara nang dead-on-arrival. JOCELYN TABANGCURA-DOMENDEN

INANUNSYO kaninang umaga (Pebrero 5) ni Philippine National Police officer-in-charge Deputy Director-General Leonardo Espina na ang bangkay ni Malaysian terrorist Zulkifli bin Hir, alyas Marwan, ay inilibing na sa isang barangay sa Mamasapano town sa Maguindanao.

Sinabi ni Espina sa mga miyembro ng mga mamamahayag na may natanggap silang  intelligence reports na si Marwan ay ibinaon na sa lugar.

“He had to be buried (right away) as per Muslim culture,” paliwanag pa ni Espina.

Magkagayunman, hindi idinetalye ni Espina kung saang barangay inilibing ang numero unong wanted na terorista.

Una nang pinasinungalingan ng mga residente ng Bgy. Libutan na sa kanilang lugar inilibing si Marwan, ang pinakamatanda at pinakasagradong Mosque sa buong Maguindanao.

Sinabi ng mga residente na hindi sila makapapayag na ang isang terorista na tulad ni Marwan ang humimlay sa nasabing sacred site.

Noong Enero 25, naglatag ang Philippine National Police-Special Action Force (PNP-SAF) ng Oplan Exodus para kuwelyuhan si Marwan at ang Filipino bomb maker at miyembro ng Abu Sayyaf na si Abdul Basit Usman.

Napatay ng mga elite commandos si Marwan bago nakabakbakan ang Moro members ng Moro Islamic Liberation Front (MILF) at ang breakaway group na Bangsamoro Islamic Freedom (BIFF) kung saan 44 SAF men ang nalagas.

Samantala, nakatakas si Usman at nananatiling malaya pa. ROBERT TICZON

KALABOSO ang dalawang talamak na drug pusher nang maaresto ng mga tauhan ng pulisya sa isinagawang buy-bust operation kamakalawa sa Makati City.

Nahaharap sa kasong paglabag sa Section 5 and 11 ng Republic Act 9165 (selling and possession of dangerous drugs) ang mga suspek na sina Arnaldo Crisostomo, 34, ng 2892 H. Santos St., Bgy. Tejeros ng naturang lungsod at Angel Jamito, 35, ng #150 Metropolitan Ave. ng nabanggit na barangay.

Sa ulat na isinumite kay S/Supt. Ernesto Barlam, Officer-in-Charge sa Makati City Police, alas-8:10 ng gabi nang isagawa ang operasyon laban sa mga suspek sa kahabaan ng Davila St., ng nabanggit na siyudad.

Nauna rito, nakatanggap ng impormasyon ang operatiba ng Station Anti-Illegal Drugs-Special Operation Task Force (SAID-SOTF) ng Makati City Police hinggil sa umano’y pagbebenta ng droga ng mga suspek sa naturang lugar.

Dahi dito, agad nagsagawa ng isang buy-bust ops ang mga pulis at isa sa mga miyembro nila ang nagpanggap na poseur buyer.

Nang makabili na ng shabu ang nagpanggap na pulis, dito na inaresto ang dalawang suspek kung saan nakumpiska sa kanilang pag-iingat ang isang plastic sachet ng shabu.

Kasalukuyang nakakulong sa detention cell ng Makati City Police ang dalawang suspek. JAY REYES

TINANGGALAN ng lisensya ng Korte Suprema ang isang abogado na nahatulan sa kasong homicide pero nakalaya dahil sa parole.

Sa per curiam decision ng Supreme Court En Banc nitong Pebrero 3, 2015, pinatawan ng disbarment si Atty. Raul Sesbreno.

Nag-ugat ang desisyon sa disbarment case na inihain ni Dr. Melvyn Garcia.

Nabatid na si Sesbreno ay nauna nang hinatulan na guilty ng Cebu City Regional Trial Court (RTC) Branch 18 sa kasong murder, pero ito’y kanyang iniapela sa Korte Suprema na nagpasya naman na pababain ang kanyang krimen sa homicide.

Kaya mula sa orihinal na parusa na reclusion perpetua na ipinataw ng Cebu City RTC, pinababa ng Korte Suprema ang hatol kay Sesbreno ng mula siyam na taon at isang araw hanggang 16 na taon. July 27, 2001 nang makalaya si Sesbreno matapos siyang magawaran ng parole noong July 10, 2001.

Inaprubahan ng Korte Suprema ang rekomendasyon at findings ng Integrated Bar of the Philippines, Commission on Bar Discipline at IBP Board of Governors, na ang kaso ni Sesbreno ay may elemento ng moral turpitude.

At sang-ayon sa Section 27, Rules 138 ng Rules of Court, sinomang miyembro ng bar ay maaring matanggalan ng lisensya o kaya ay masuspinde bilang abogado kapag nahatulan sa krimen na may kinalaman sa moral turpitude.

Bagama’t napagkalooban umano si Sesbreno ng executive clemency, hindi naman nabanggit kung ito ba’y absolute at unconditional lalo pa’t pinaikli lamang naman ang kanyang sentensya ng hanggang sampung taon.

Binigyang-diin pa ng Korte Suprema na ang pagpractice ng abogasya ay isang pribilehiyo na ibinibigay sa mga indibidwal na may good moral character. TERESA TAVARES

NALAGAS sa halos isang oras na bakbakan laban sa tropa ng pamahalaan ang isang Abu Sayyaf Group (ASG) commander sa Patikul, Sulu, kaninang umaga (Pebrero 5).

Sinabi ni Capt. Ma. Rowena Muyuela, spokesperson ng Philippine Armed Forces’ Western Mindanao Command, na ang mga miyembro ng Joint Task Group Sulu (JTGS) ang naka-engkwentro sa isang malaking grupo ng mga bandido sa Sitio Kan Udang, Bgy. Taglibi, dakong 9:10 ng umaga.

“The firefight raged for 45 minutes and there were undetermined number of casualties inflicted on the Abu Sayyaf Group,” pagmamalaki ni Muyuela.

Ayon naman kay JTGS commander Col. Alan Arrojado, na ang nakabakbakan ng mga sundalo ay ang mga tauhan ni Hatib Hajan Sawajaan.

Ang grupo ni Sawajaan ang itunuturong dumukot sa isang Malaysian businessmen at sa mag-asawang aleman noong nakaraang taon.

Sinabi ni Arrojado na kabilang sa mga napatay ay isang nagngangalang Murasil, isang sub-leader sa ilalim ni Sawajaan. ROBERT TICZON

HINATULAN ng habambuhay na pagkabilanggo ng korte ang pangunahing salarin sa pagpaslang sa isang radio broadcaster sa Iriga City.

Batay sa 11-pahinang desisyon ni Judge Timoteo Panga, Jr., pinagtibay nito ang hatol na reclusion perpetua laban kay Eric Vargas, ang pumaslang sa anchorman ng DWEB FM sa nasabing lungsod na si Miguel “Mike” Belen.

Emosyunal ang asawa ni Belen na si Mary Jane matapos marinig ang hatol ni Judge Panga. Apat na taon nilang hinintay ang desisyon ng korte sa kaso.

Magugunitang Hulyo 9, 2010 nang pagbabarilin si Belen ng mga salarin na nakasakay sa motorsiklo.

Na-ospital pa ng 20-araw si Belen bago tuluyang binawian ng buhay ngunit naituro pa niya si Vargas na siyang driver ng sasakyan bago ito malagutan ng hininga.

Patuloy namang pinaghahanap ang isang Gina Bagazina na umano’y bumaril sa mamamahayag habang si Vargas naman ay nasentensyahan na ng korte. JOHNNY ARASGA

NEGATIBO sa posibleng pagtagas ng langis o oil spill mula sa sumadsad na cargo ship sa karagatan sakop ng Guimaras.

Ito’y ayon na rin sa report ng Philippine Coast Guard (PCG) matapos sumadsad sa baybayin ng Siete Picados ang MT King Andrew, na may 21 tripulante at may kargang 1,480 metric tons ng cane molasses.

Ayon sa PCG, agad rumesponde ang Coast Guard Station sa Iloilo at ng Marine Environmental Protection Unit sa Western Visayas nang makatanggap sila ng alarma hinggil sa pagsadsad ng nasabing barko.

Nabatid na alas-1:00 ng gabi noong Pebrero 3 nang umalis ang cargo mula sa Lapuz Wharf sa Iloilo at patungo sanang Calaca, Batangas.

Sa isinigawang occular inspection ng PCG, walang bakas ng oil sheen sa pinangyarihan ng aksidente.

Agad namang nagpalabas ang Coast Guard Sub-station Dumangas ng Maritime Violation Receipt sa ship captain ng cargo ship dahil hindi ito agad nakapagbigay ng notice of incident na umano’y paglabag sa isang MARINA Memorandum Circular.

Inabisuhan na rin ng PCG ang may-ari ng cargo ship na umupa ng tug boat na hahatak sa sumadsad na sasakyang-pandagat. JOCELYN TABANGCURA-DOMENDEN

UMINGAN, PANGASINAN – Isang day care teacher ang patay matapos barilin ng riding-in-tandem sa Bgy. Andres, Umingan sa nasabing lalawigan kahapon, Pebrero 5.

Kinilala ng Umingan police ang biktimang si Jerwin Nogal, 21, ng Bgy. Andres, sa ng nasabing bayan, na nagtamo ng apat na tama ng baril sa iba’t ibang bahagi ng katawan.

Samantala, sugatan din ang lola ng biktima dahil sa daplis ng ligaw na bala.

“Di naman ako makapaniwala na nabaril, bakit naman babarilin? Baka ibang Jerwin naman dahil wala naman po akong alam na kaaway itong anak ko,” sadd ng ama ng biktima.

Sa inisyal sa imbestigasyon, nakasakay sa tricycle ang biktima kasama ang kanyang lola para bisitahin ang kanyang nanay sa ospital nang harangin sila ng hindi pa nakikilalang mga suspek at pagbabarilin.

“Si Jerwin po mabait na bata po ‘yan. Two years pa lang po siya sa aming association, pagkakakilala po namin sa kanya isa siyang mabait na day-care worker. Siya po ang pinakabatang day-care worker sa amin,” ani Nelia Caburnay, president ng Day Care Worker Association Umingan.

Nagsasagawa na ng follow-up investigation ang awtoridad hinggil sa insidente. ALLAN BERGONIA

TADTAD ng saksak sa iba’t ibang bahagi ng katawan ang isang lalaki nang ipagtanggol ng ama ang kanyang anak na hinagisan ng una ng tsinelas sa kanilang condo unit sa Tondo, Maynila.

Idineklarang dead-on-arrival sa Tondo Medical Center ang biktimang si Rogelio Chiva, 32, stevedore, ng room 517 Bldg.7, 5th Flr., Permanent Housing, Balut, Tondo.

Arestado naman ang suspek na si Fernando Catilo alyas Vandolf, 49, may-asawa, butcher at nakatira sa room 524 ng nasabi ring condoominium.

Sa report nio SPO3 Jonathan Bautista, ng Manila Police District-Homicide Section, naganap ang insidente sa harapan ng bahay ng biktima.

Nauna rito, nakaupo umano ang biktima sa harapan ng kanilang tintuluyang unit nang maisipan nitong batuhin ng tsinelas sa isang nagngangalang Valdemor.

Nakita naman ng kapatid nitong si Rhea Chiva ang ginawa ng biktima kaya sinaway nito at sinabihang pumasok na lamang sa kanilang unit upang hindi mapaaway.

Nang papasok na ang biktima sa kanilang unit ay siya namang dating ni Valdemor at agad na sinuntok sa mukha ang biktima hanggang sa magpambuno ang dalawa.

Nakita naman ng suspek na ama ni Valdemor ang pagsusuntokan ng anak at biktima kaya aga  itong kumuha ng patalim saka sunod-sunod na inundayan ng saksak ang biktima.

Agad namang naisugod ang biktima sa naturang ospital subalit hindi na rin ito naisalba pa.

Kasalukuyan nang nakakulong ang suspek sa MPD-Homicide Section at nakatakdang sampahan ng kasong murder. JOCELYN TABANGCURA-DOMENDEN

HINIHINALANG problema sa pag-aaral ang nagtulak sa isang 18-anyos na estudyante na magpakamatay sa pagtalon mula sa ika-anim na palapag na Car Park kahapon ng umaga sa Makati City.

Namatay habang ginagamot sa Makati Medical Center ang biktimang si Viam Madamba, estudyante sa isang British School, ng #57 San Geregorio St., Bgy. Magallanes Village, Makati City, sanhi ng tinamo nitong pinsala sa ulo at katawan.

Sa ulat na isinumite kay S/Supt. Ernesto Barlam, Makati City Police Officer-In-Charge, alas-6:30 ng umaga nang maganap ang insidente sa 6th level ng Dela Rosa Car Park, Dela Rosa St., Legazpi Village ng naturang lungsod.

Nagtungo ang biktima sa naturang car park kung saan bigla na lamang umano itong tumalon mula sa nabatid na palapag ng gusali.

Pagbagsak ng binata sa semento ay agad itong isinugod ng ilang concerned citizen sa nabatid na ospital ngunit binawian din ng buhay sanhi ng grabeng pinsalang tinamo.

Napag-alaman ng pulisya na may kinikimkim umanong problema ang biktima sa kanyang pag-aaral kaya malaki ang hinala ng mga awtoridad na ito ang naging motibo sa kanyang pagpapakamatay.

Nagsasagawa naman ng imbestigasyon ang pulisya kung may foul play sa naganap na insidente. JAY REYES

SAPUL sa ulo ang isang 45-anyos na caretaker na nagbibisikleta nang tambangan ito ng riding-in-tandem kahapon ng umaga sa Makati City.

Patay sa pinangyarihang lugar ang biktimang si Reynaldo Reyes, ng 3902 Macabulos St., Bgy. Bangkal, ng nasabing lungsod, sanhi ng tinamong tama ng bala sa ulo.

Inaalam naman ng pulisya ang pagkakakilanlan ng mga suspek sakay ng isang hindi naplakahang motorsiklo na agad tumakas matapos ang pamamaril.

Sa imbestigasyon ng homicide section ng Makati City Police, alas-6:30 ng umaga nang maganap ang pamamaril sa Evangelista St., Bgy. Bangkal.

Nauna rito, kakahatid lamang umano ng biktima sa kanyang 9-anyos na anak sa eskwelahan at pauwi na sana nang biglang sumulpot ang mga suspek sakay ng isang motorsiklo at walang sabi-sabing binaril ito sa ulo.

Duguang humandusay ang biktima na agad nalagutan ng hininga habang mabilis na tumakas ang mga suspek.

Napag-alaman naman sa kapatid ng biktima na si Imelda na wala umanong kaalitan ang kanyang kapatid kundi ang isang police Colonel na nakasagutan nito noon pang nakaraang taon makaraang magkaalitan ang dalawa dahil pinagbawalan umano ng biktima na iwanan ng nasabing pulis ang kanyang mga manok na panabong sa binabantayan nitong bakanteng lote.ari.

Patuloy namang iniimbestigahan ng pulisya ang motibo sa pamamaslang sa biktima. JAY REYES

SINUSPINDE ng 30-araw ng Land Transportation Franchising and Regulatory Board (LTFRB) ang operasyon ng Dela Rosa Transit na nakabangga sa isang kotse sa EDSA, Muñoz kahapon.

Sa isang panayam, sinabi ni Engr. Ronaldo Corpus, boardmember ng LTFRB, limang unit ng bus company ang apektado ng suspension order kasama ang nakabanggang bus unit na magkakasama sa iisang franchise.

Ang suspension order ay inaprubahan ng LTFRB board kahapon matapos pag-usapan ng ahensya ang naturang aksidente.

“Limang bus unit ang affected ng suspension kase iisa ang kanilang franchise, isang buwan ang suspension kase SOP ‘yun kapag may nangyaring aksidente sa mga passenger vehicles” ani Corpus.

Bukod aniya sa preventive suspension, inatasan ng LTFRB ang lahat ng driver ng Dela Rosa Transit na sumailalim sa drug testing at dapat na sumailalim ang mga ito sa road safety seminar na ipinatutupad ng ahensya.

Isasailalim din aniya sa road worthiness test ang mga sasakyan ng bus company.

Nitong nakalipas na Huwebes ng umaga, isang unit ng Dela Rosa (TYM 249) ang halos kumain sa likod na bahagi ng isang gray na Toyota Vios (YL 1942) sa may  northbound lane ng EDSA Extn. sa Muñoz, QC. Nakaligtas naman ang driver ng kotse matapos dalhin sa pagamutan.

Sumuko naman sa pulisya ang driver ng bus na kinilalang si Nonong Cumali. SANTI CELARIO