ISA ang beteranong journalist na si Joel Palacios sa anim na napatay sa insidente ng pag-aamok at pananaksak sa isang condominium sa Pasay City, kagabi.

Sa inilabas na spot report ng Pasay City Police, kabilang ang pangalan ni Palacios sa mga binawian ng buhay sa Pasay City General Hospital matapos magtamo ng mga saksak sa katawan.

Nagsilbing mamamahayag ang 70-taong gulang na si Palacios sa Associated Press at Manila Standard.

Siya rin ang naging dating Vice President for Media Affairs ng Social Security System (SSS).

Nakilala ang suspek na si Alberto Garan alyas Abet, 39, tubong Brgy. Catugay Baggao, Cagayan.

Ayon kay NCRPO Dir. Oscar Albayalde, nagtalo sa ika-14 na palapag ang suspek at kasintahang si Emelyn Sagun.

Bigla na lang nagpaputok ng baril ang suspek at kumuha na ng kutsilyo sabay pinagsasaksak si Sagun.

Hindi pa nakuntento ang suspek at inihulog si Sagun mula ika-16 na palapag hanggang basement.

Umakyat ang suspek sa ika-22 palapag at inundayan din ng saksak ang iba pang nakasalubong na tenant.

Agad na nagsagawa ng clearing operations sa mga unit ng condo ang mga SWAT. Pinalabas din ang mga tenant sa gusali.

Mag-a-alas-11:00 kagabi nang mapatay ng SWAT ang suspek sa isang unit.

Selos ang isa sa tinitingnang motibo sa pananaksak ayon naman kay SPD Director Tomas Apolinario.

Patuloy ang isinasagawang imbestigasyon ng Pasay Police sa insidente. JOHNNY ARASGA

SINALAKAY ng mga armadong kalalakiihan ang isang presinto sa Tanauan City, Batangas nitong Miyerkules ng gabi na ikinamatay ng dalawang pulis.

Dead-on-the-spot ang mga biktimang sina PO3 Edgar Oba-ob at PO1 Ryan Cedric de Guzman na kapwa miyembro ng Tanauan City police station.

Isinugod naman sa Laurel Hospital ang isang biktima na si Bendio Valencia matapos tamaan ng ligaw na bala sa katawan.

Sa ulat, naganap ang insidente dakong 10 p.m. sa nasabing presinto na nasa harap ng Tinurik PAC Base sa Brgy. Tinurik, Tanauan City.

Bago ito, naka-duty ang mga biktima sa front desk ng presinto nang biglang dumating ang may 10 suspek lulan sa tatlong sasakyan saka pinaulanan ng putok ang nasabing presinto.

Matapos ang pamamaril, tumakas agad ang mga salarin patungong Brgy. Natatas, Tanauan City.

Blangko pa ang kapullisan kung ano ang motibo sa pagsalakay at anong grupo kasanib ang mga suspek. BOBBY TICZON

HINDI man nasilo ang target ng pagsisilbi ng search warrant, nakakumpiska naman ang pulisya ng shabu mula sa runner nito sa Quezon City kagabi, Miyerkules.

Ayon sa Quezon City Police District-District Drug Enforcement Unit (QCPD-DDEU), naihawla nila ang runner na nakilalang si Anthony “Butchoy” Pantinople, na katiwala at pinagmamantine ng drug den ng suspect na si Osing Morales. Si Morales na target ng search warrant ay miyembro ng Bonnet Gang at robbery hold-up group.

Bagama’t wala si Morales nang isagawa ang pagsisilbi ng serch warrant, nahuli si Pantinople dahil sa sobrang bangag sa droga at nakumpiska sa kanya ng 20 gramo ng shabu na may street value na P200,000.

Sa ulat, naganap ang insidente dakong 10 p.m. sa bahay ni Morales sa na ginagawang drug den sa may Feria Rd., Brgy. Old Balara, Q.C.

Ayon kay P/Insp. Ferdinand Mendoza, QCPD-DDEU chief, bago ang insidente ay isisilbi ng mga operatiba ng DDEU ang isang search warrant sa paglabag sa Comprehensive Drugs Act laban kay Morales.

Maliban sa shabu, nakakumpiska rin ang operatiba ng mga bala sa loob ng drug den ni Morales.

Dinala si Pantinople sa Camp Karingal habang patuloy na hinahanap si Morales, ayon pa sa ulat. BOBBY TICZON

NASILO na ng pulisya ang lalaking nagsaboy ng asido sa mag-inang tumatawid ng footbridge sa kanto ng A. Bonifacio Avenue at Sgt. Rivera, sa Quezon City nitong nakaraang Biyernes ng hapon.

Pero dahil may diperensya ang suspect sa pagiisip ay hindi na inilabas ang buong pagkakakilanlan nito.

Matatandaang kahapon ay marami ang naalarma nang sabuyan ng asido ang mag-inang biktima na tumama sa braso, kamay at paa.

Dahil dito, mananatili muna sa kamay ng pulisya ang suspek dahil maituturing itong mapanganib.

Narekober din sa kanya ang ilang bote, kasama na ang sinasabing lalagyan ng asido.

Payo naman ni Quezon City Police District (QCPD) Dir. C/Supt. Guillermo Eleazar, dapat maging alerto ang publiko at agad na isumbong ang mga ganitong insidente upang marespondehan agad ng mga naka-deploy na tauhan ng PNP. BOBBY TICZON

TATLONG katao ang sugatan kabilang ang 15-anyos na binatilyo matapos ang pamamaril ng hinihinalang kalabang grupo ng kabataan sa Navotas City kaninang madaling-araw, Sept. 2.

Sina Genes Sese, 23, ng Kapalaran 3, Brgy. Daanghari; Clemento Lozado, 33, at kanyang 15-anyos na pinsan, kapwa ng Rd. 10, cor. C3 Rd., Brgy. North Bay Boulevard South (NBBS) ay ginagamot sa Tondo Medical Center sanhi ng mga tama ng bala.

Lumalabas sa imbestigasyon ng pulisya, dakong 12:45 ng madaling-araw, nag-iihaw ng isda si Lozado at kanyang menor-de-edad na pinsan sa harap ng kanilang bahay nang dumating ang grupo ng kabataan na sakay ng tricycle at walang sabi-sabing pinagbabaril ang mga ito.

Tinamaan si Lozado sa kaliwang tainga habang ang kanyang pinsan ay tinamaan naman sa kanang at paa, habang si Sese na nasa harap ng gate ng Navotas Fish Port ay nahagip naman ng ligaw na bala sa kaliwang braso.

Matapos ang insidente, mabilis na tumakas ang mga suspek sa hindi matukoy na direksyon habang narekober ng pulisya sa pinangyarihan ng insidente ang mga basyo ng bala ng hindi pa matukoy na kalibre ng baril.

Paniwala ng mga biktima na may kinalaman umano ang insidente sa away sa pagitan ng grupo ng mga kabataan ng Sawata kontra sa grupo ng mga teenagers sa Sitio Puting Bato. ROGER PANIZAL

HINAHANTING na ngayon ng pulisya ang isang bakla na gumahasa at pumatay sa kursunadang binatilyo sa Iloilo kaninang Linggo ng madaling-araw.

Ang suspek na nakilala lamang na alyas Smile, isang beautician ay sinampahan na ng kaukulang kaso dahil sa pagpatay sa 14-anyos na biktima na sadyang hindi pinangalanan.

Sa ulat, natagpuan ang bangkay ng biktima dakong 1:15 a.m. sa isang pilapil sa Brgy. Tinguian, Balasan.

Ayon sa lolo ng biktima na si Ricardo delos Reyes, dumalo sa sayawan ang kaniyang apo kasama ang mga barkada dahil fiesta sa lugar.

Sa gitna ng okasyon, nakitang inakbayan ito ng suspek at kinaladkad palayo ng sayawan.

Nang kanila itong hinanap ay bangkay na nang matagpuan at walang saplot ang katawan at nakahandusay sa pilapil.

Ayon sa lolo, nagdurugo ang puwet ng kanyang apo na posibleng dulot ng pagpasok ng matigas na bagay.

Namamaga rin aniya ang ari ng kanyang apo at may senyales na sinakal ito hanggang sa mapatay. May pasa ang katawan at nabungi ang ngipin ng biktima na pinaniniwalaang hinampas ng matigas na bagay.

Naiwan naman sa crime scene ang itim na palda ng suspek. BOBBY TICZON

PATAY ang dalawang batang lalaki matapos tupukin ng apoy ng kanilang bahay sa bayan ng Dolores sa Quezon, Sabado ng gabi, Sept. 2.

Ayon sa report ng Quezon police office, nakilala ang mga biktimang sina Joshua Plata, 7, at kapatid na si Dave, 5.

Nabatid na nasunog ang “sawali” hut ng mga biktima sa Brgy. Bulakin 2 bandang 10:45 ng gabi.

Ayon sa kuya ng mga biktima na si Christian Plata, natutulog ang kanyang mga kapatid nang sumiklab ang sunog na agad na kumalat sa buong bahay.

Nagawa niya aniyang makatakas at makahingi ng tulong pero pagbalik niya, natagpuan nang patay matapos masunog ang kanyang dalawang nakababatang kapatid.

Nagtamo naman ng burn injuries si Christian at dinala na sa isang ospital para lapatan ng lunas.

Batay sa ulat, posibleng ang naiwan na nakasinding kandila ang naging sanhi ng sunog. JOHNNY ARASGA

DINAMPOT ng pulisya si Puerto Princesa vice mayor Luis Marcaida III matapos salakayin ang kanyang bahay at makakumpiska ng ilang piraso ng baril at droga kaninang Lunes ng umaga.

Si Marcaida III ay nakakulong na ngayon sa Palawan Provincial Police Office (PPP0) at nakatakdang sampahan ng kasong possession of guns and ammunition at possession of drugs.

Sa ulat, naganap an pagsalakay dakong 6 a.m. sa bahay ng suspect sa Jacana Road, Brgy. Bancao-Bancao, Puerto Princesa.

Bago ito, may impormasyon na nakuha ang awtoridad na may mga nakaimbak na armas at droga sa bahay ni Marcaisa III.

Sa bisa ng isang search warrant na ipinalabas ni Manila City Regional Trial Court Executive Judge Reynaldo Alahambra sa paglabag sa Section 11, Article 2 ng Republic Act 9165 o Comprehensive Dangerous Drug Act of 2002, sinalakay ng mga operatiba ng Philippine National Police Drug Enforcement Group, Philippine Drug Enforcement Agency (PDEA), Puerto Princesa City Police Station at Palawan Provincial Police Office ang bahay ng suspek sa nasabing barangay.

Narekober sa bahay ni Marcaida II ang 30 sachets ng hinihinalang shabu na nakabalot sa isang transparent plastic pack, 1 .22 cal rifle, 3 rifle grenades, 1 fragmentation grenade, at 4 na .45 cal. pistols.

Ang pag-imbentaryo sa nakumpiskang droga at paghahalughog ay patuloy na isinasagawa sa presensya ni Barangay Captain Marilou Gumangan ng Bry. Bancao-Bancao, Barangay Captain Francisco Gabuco ng Brgy. San Pedro sa Puerto Princesa, at local media. BOBBY TICZON

SWAK sa kulungan ang isang dating Dangerous Drug Regulation Officer (DDRO) ng Philippine Drug Enforcement Agency (PDEA) matapos madakip sa Tacloban City matapos magbenta ng shabu nitong nakalipas na Linggo.

Kinilala ni PDEA Officer-in-Charge Jesus A Fajardo ang suspek na si Julius KatangKatang, 35, ng Brgy. San Roque, Jaro, Leyte.

Si KatangKatang ay dating nagtrabaho sa PDEA Regional Office VIII (PDEA ROVIII) bilang DDRO na ang kanyang trabaho ay kabilang ang evaluation at processing ng lisensya ng medical practitioners at registered stakeholders na nag-aaplay ng issuance ng controlled precursors at essential chemicals (CPECs) at dangerous drugs licenses.

Nasibak siya sa trabaho dahil umano sa madalas na pagliban ng walang kaukulang official leave (AWOL) simula Pebrero 2017.

Nitong nakalipas na Agosto 29, 2017 dakong alas 8:45 ng gabi ang pinagsanib na element ng PDEA ROVIII sa ilalim ni Director Edgar Jubay, Tacloban City Police Office-CPDEU at 8th MIB, Philippine Army ay nadakip si KatangKatang sa isinagawang buy-bust operation sa Brgy. 33, P. Burgos St., Tacloban City.

Nakumpiska sa suspek ang pitong transparent plalstic sachets na naglalaman ng shabu, na may timbang na 300 gramo at may market value na P1,500,000 at iba’t ibang drug paraphernalia.

Nahaharap ngayong sa kasong paglabag sa Section 5 (Sale of Dangerous Drugs),Section 11 (Possession of Dangerous Drugs) at Section 12 (Possession of Drug Paraphernalia), Article II of Republic Act 9165, na mas kilala sa the Comprehensive Dangerous Drugs Act of 2002, ang suspek. SANTI CELARIO

NATUPOK ng apoy ang isang residential area na ikinadamay din ng dalawang gusali at kaninang umaga sa San Andres, Maynila.

Ayon kay Manila Fire District Marshall Supt. Antonio Razal, Jr. nagsimulang sumiklab ang sunog dakong 8:07 ng umaga sa ikalawang palapag ng bahay na pagmamay-ari ni Selpa Garcia sa 1858 Estrada St., San Andres Bukid, Manila.

Gawa umano sa light materials ang mga kabahayan sa lugar kaya agad itong inakyat sa ikatlong alarma, at idineklarang fireout dakong 9:14 ng umaga.

Umabot sa P100,000 ang kabuuang halaga ng nasunog na ari-arian at wala namang naiulat na nasugatan sa 15 bahay na nilamon ng apoy.

Ayon sa mga imbestigador ng Arson, patuloy ang isinasagawang imbestigasyon kung ano ang pinagmulan ng sunog.

Samantala, nagpadala naman si Manila Mayor Joseph ng relief workers upang tulungan ang mga nasunugan.

Partikular na inatasan ni Estrada ang Manila Department of Social Welare (MDSW) na maghanda ng mga pagkain at pangangailangan ng mga apektadong pamilya. JOCELYN TABANGCURA- DOMENDEN

INATASAN ng Sandiganbayan 3rd Division ang dalawang law enforcement agencies para kwelyuhan si Moro National Liberation Front (MNLF) founding chairman Nur Misuari kaugnay sa alegasyong korapsyon.

Kaninang Miyerkules ng umaga lamang nang ipinalabas ng korte ang arrest warrants laban kay Misuari matapos maky makitang sapat na katibayan o probable cause para isalang sa pagdinig ang dating Autonomous Region in Muslim Mindanao (ARMM) governor at maging ang iba pang ARMM officials at pribadong indibidwal sa dalawang counts of graft at 2 counts of malversation sa umano;y maanomalyang pagbili ng educational materials noong 2000.

Ang warrants, na may petsang Aug. 31, 2017, ay ni-release sa Philippine National Police Criminal Investigation and Detection Group (PNP-CIDG) at sa National Bureau of Investigation (NBI), at ang kanilang local counterparts sa Cotabato City, pahayag ni 3rd Division Clerk of Court Dennis Pulma.

Nagtakda naman ang korte ng P200,000 – P460,000 na bail bawat isa para sa kasong malversation through falsification, at P30,000 bawat isa para naman sa kasong graft.

Sinabi ni MNLF spokesperson Rev. Absalom Cerveza, handa namang ipagtanggol ni Misuari ang kanyang sarili sa mga kasong nabanggit.

Hindi naman tiyak pa ang korte kung may probable cause para isalang sa pagdinig si Misuari para sa 2 iba pang kaso na may koneksyon sa umano’y maanomalyang educational materials purchase- isang graft at isang malversation through falsification charge dahil inatasan pa ang prosekusyon na magbigay ng karagdagang ebidensya.

Sa anim na reklamo, sinabi ng Office of the Ombudsman na si Misuari at iba pang akusado ay gumastos ng P115-million para sa educational materials na nabuko na non-existent dahil hindi naman nai-deliber sa natokang recipients. BOBBY TICZON

LIMA ang agarang namatay habang 11 naman ang nasugatan nang sumalpok ang kanilang sinasakyang pampasaherong dyip sa isang konkretong poste sa Cavite town kaninang Miyerkules ng umaga, Setyembre 6.

Dead-on-the-spot sanhi ng tinamong pinsala sa iba’t bang bahagi ng katawan ang mga biktimang hindi pa nakikilala.

Isinugod naman sa Kawit Kalayaan Hospital at Divine Grace Medical Center sa General Trias, Cavite ang mga sugatang biktima kabilang ang driver ng dyip na may plakang DVK-713. Karamihan sa mga biktima ay mga estudyante at empleyado ng mga ospital.

Sa ulat, naganap ang insidente dakong 6:15 a.m. sa Centennial Rd. sa Kawit, Cavite.

Bago ito, nagmula ang dyip sa Tanza at papuntang Zapote nang pagsapit sa lugar ay biglang nadulas sa kalsada ang dyip na may 16 sakay saka sumalpok sa poste ng kuryente.

Sa lakas ng pagsalpok, nabasag at natanggal ang windshield at nayupi ang unahan ng dyip na dahilan kaya naipit ang mga pasahero.

Ayon kay C/Insp. Jeffrey Punzalan ng Kawit police station, “self-accident” ang pagkakabangga ng dyip. BOBBY TICZON

DAHIL sa kanyang nasasakupang lungsod itinapon ang bangkay, nag-alok si Gapan City Mayor Emerson Pascual ng P200,000 sa sinomang makapagbibigay ng impormasyon para mahuli ang mga sangkot sa pagpatay at pagtapon sa bangkay ng 14-anyos na si Reynaldo de Guzman, alyas ‘Kulot’.

“Kung sinomang makakapagturo kung ano ang plate number, anong sasakyan, o nakakakilala doon sa tao, kung sino man ang nagtapon kay Kulot, magbibigay ako ng P200,000,” pahayag kaninang Huwebes ng umaga ni Pascual.

Tiniyak naman agad ni Pascual na kung sinoman ang may alam sa pagpatay at pagtapon sa binatilyo ay itatago ang kanyang pagkakakilanlan.

“Ang kailangan ko lang makatulong ako sa bata, na may pagmumulan ‘yung imbestigasyon ng pulis,” pahayag ni Pascual.

Ang bangkay ni De Guzman ay natagpuan nitong nakaraang Martes, Sept. 5, na palutang-lutang sa isang creek sa Brgy. San Roque, sa Gapan City, Nueva Ecija.

Nakabalot ang kanyang ulo ng masking tape na karaniwang ginagawa sa vigilante killings.

Si De Guzman, kasama ang 19-anyos na si Carl Angelo Arnaiz, na huling nakitang buhay noong Agosto 18 ay umaalis sa kanilang lugar sa Cainta, Rizal, upang mag-midnight snack.

Pero hindi na ito nakauwi at bagkus ay natagpuan sa isang morgue sa Caloocan City 10 araw ang nakalipas matapos mapatay sa isang shootout sa mga pulis matapos mangholdap umano ng isang taxi driver.

Ayon kay Pascual, ang pagkakadiskubre sa bangkay ni De Guzman ay gumimbal sa mga residente ng Gapan City, na isa sa pinakatahimik na lugar sa probinsya.

Naniniwala naman si Pascual na pinatay si De Guzman sa labas ng Gapan at doon lamang ito tinapon upang iligaw ang mga taong naghahanap sa binatilyo. BOBBY TICZON

NATUSTA nang buhay ang isang mag-ina nang sumiklab ang sunog sa residential area sa Tondo, Maynila.

Kinilala ang mag-inang sina Venus Liqid, 35, at tatlong-taong gulang na anak na babae na si Althea Michelline Mae, ng Varona St., Tondo.

Ayon kay S/Insp. Reden Alumno, hepe ng investigation unit ng Bureau of Fire Protection (BFP), nagsimula ang sunog pasado alas-3:00 Miyerkules ng hapon sa ikalawang palapag ng bahay na pagmamay-ari ng isang Herminia Hipolito.

Sa imbestigasyon, lumalabas na natutulog ang mag-ina nang maganap ang sunog kung saan natagpuan sila sa ikalawang palapag.

Mabilis namang kumalat ang apoy dahil dikit-dikit ang mga bahay kaya inakyat sa ikalawang alarma ang sunog na idineklarang fireout dakong alas-5:41 ng hapon.

Maliit umano ang mga eskinita sa lugar kaya nahirapan ang mga bumbero na pasukin ang mga kabahayang nilalamon ng apoy.

Halos binalot ng maitim na usok ang pitong magkakadikit na barong-barong kaya agad na inakyat sa ikalawang alarma ang sunog.

Hinihinalang iligal na linya ng kuryente naman ang pinagmulan ng sunog. JOCELYN TABANGCURA-DOMENDEN

TEPOK ang isang pulis at ang sinasabing leader ng gun-for hire group at kasama nito na sangkot sa kalakaran ng iligal na droga matapos ang naganap na police encounter sa Caloocan City kaninang madaling-araw, Setyembre 8.

Ayon kay Caloocan police Chief S/Supt. Jemar Modequillo, binawian ng buhay sanhi ng tama ng bala sa ulo habang ginagamot sa Dr. Jose N. Rodriguez Hospital si PO3 Junior Hilario ng Police Community Precinct (PCP).

Dead-on-the-spot naman ang mga suspek na sina alyas “Jayson Killer” at kasama nitong si Mark Ian Herrera sanhi rin ng mga tama ng bala sa katawan.

Sa ulat ni S/Supt. Modequillo, dakong 12:09 ng hatinggabi nang magsagawa ng anti-drug operation ang pinagsanib na tropa ng PCP-3 at PCP-5 kontra sa suspek matapos makatanggap sila ng impormasyon na may transaksyon ito sa droga sa 3869 Paraiso St., Sampaguita Subd., Brgy. 175, Camarin.

Nang mapansin ng suspek ang presensya ng pulisya, agad nitong pinaputukan ang mga operatiba at tinamaan sa ulo si PO3 Hilario kaya gumanti ng mga putok ang mga ito na nagresulta ng kamatayan ng suspek.

Narekober sa nasawing suspek ang cal. 45 pistola, tatlong sachet ng shabu, drug paraphernalia at replica ng .9mm Glock habang ang 75 basyo ng bala mula sa shotgun, calibers .9mm, .45, at 5.56 pistols at rifle ang nakuha sa crime scene.

Dakong 4:00 ng madaling-araw, nakatanggap ng tip ang mga operatiba ng PCP-3 na nakita si Herrera sa Diamond St., Brgy. 175 subalit nang puntuhan ng mga ito ay nakipagbarilan ang suspek kaya napatay ito ng mga pulis at narekober sa kanya ang cal.38 revolver at apat na sachets ng shabu. RENE MANAHAN

PATAY ang isang 30-anyos na dating overseas Filipino worker (OFW) matapos magbigti habang live na nakikipag-video call sa kanyang kaibigan sa Valenzuela City, Huwebes ng umaga.

Si Delfin Dennis Carreon, 30, ng 456 Service Rd., Parada, Valenzuela City ay huling nakitang buhay habang ka-video call sa facebook ang kanyang kaibigan na si Eddle Chris Ibe dakong 3:30 madaling-araw, anim na oras matapos makipag-inuman sa kanyang iba pang mga kaibigan sa Trinidad St., Brgy. Maysan.

Sa pahayag ni Ibe kina Valenzuela police homicide investigators SPO2 Ray Bragado at PO3 Roberto Medrano, dakong 9:00 ng umaga nang dumating si Carreon sa kanilang bahay galing sa inuman.

Nakatanggap ng mensahe si Ibe mula kay Carreon sa pamamagitan ng facebook na “SALAMAT NG MADAMI.” Na sinagot naman ni Ibe at tinanong si Carreon kung nasa bahay na ito.

Sumagot naman si Carreon ng larawan niya na may nakatali sa kanyang leeg habang ang dulo nito ay nakatali naman sa bakal na kisame.

Naalarma si Ibe at sinubukang aliwin si Carreon subalit, sumagot lang ito ng “MAG LIVE AQ WAIT,” kaya muli itong kinumbinsi ni Ibe ngunit hindi na sumagot si Carreon.

Agad nagtungo si Ibe sa bahay ng biktima saka sinabi ang insidente sa kanyang kapatid na babae na si Mariedelle Lim hanggang sa matagpuan nila si Carreon na nakabigti sa kuwarto nito.

Mabilis na isinugod ang biktima sa Valenzuela Medical Center subalit hindi na rin ito umabot nang buhay. RENE MANAHAN

DAHIL sa maingay na alagang aso, isang ginang ang namataang pinagtulungang saksakin sa Quezon City kagabi, Setyembre 10.

Ayon sa Quezon City Police District–Criminal Investigation and Detection Unit (QCPD-CIDU), kinilala ang biktimang si Jovy Evelyn Candelaria, 47, store owner, ng No.31 Upper Lanzones St., Brgy. Payatas Area B, QC.

Dalawa lamang sa apat na suspek ang nakilala sa alyas na “Marcelo” at alyas “Rey”, kapitbahay ng biktima, habang patuloy na inaalam ng pulisya ang pagkakakilanlan sa dalawa pang suspek.

Sa imbestigasyon, dakong 7:30 ng gabi nang pasukin ng apat ang biktima sa kanyang tindahan na nasa harap ng bahay nito sa Brgy. Payatas.

Bago ang krimen, ayon sa witness na si Nieves Rosario, nasa loob siya ng bahay nang marinig niya ang biktima na nagsisigaw ng saklolo.

Paglabas ni Rosario, nakita niya sina Rey at Marcelo kasama ang dalawa pang lalaki na armado ng itak at patalim at pilit na pinapasok ang tindahan ni Candelaria.

Sinubukan pa ng testigo na awatin ang mga suspek subalit nang malaman na lasing ang mga suspek ay agad nitong ipinaalam sa kanilang barangay ang insidente.

Agad na rumesponde ang mga opisyal ng barangay subalit huli na nang tumambad sa kanila ang wala nang buhay na biktima na tadtad ng saksak.

Hinala ng pulisya, ang maingay na aso na alaga ng biktima ang dahilan para patayin ito ng mga suspek. SANTI CELARIO

NASAWI ang isang drug suspect na inakusahang nagbibigay ng impormasyon sa pulisya hinggil sa kanilang iligal na aktibidad matapos pagsasaksakin ng kanyang mga katropa sa Caloocan City kagabi, Linggo.

Ayon kay Caloocan police chief S/Supt. Jemar Modequillo, dead-on-the-spot sanhi ng mga saksak sa katawan si Francis Mirasol alyas “Kiko”, 30, ng Brgy. 176, Bagong Silang.

Pinaghahanap na ng mga pulis ang suspek na nakilala lang sa pangalang Errol Padua at sa hindi kilalang kasama nito na mabilis na tumakas matapos ang insidente.

Sa imbestigasyon, dakong 11:30 ng gabi, naglalakad si Mirasol pauwi nang walang sabi-sabing inundayan ng mga saksak ni Padua at isa pang kasama nito.

Paniwala naman ng pulisya, posibleng nagalit ang mga kasamahan ng biktima matapos itong akusahan na nagbibigay ng tip sa mga awtoridad hinggil sa kanilang iligal na aktibidad.

Sinabi naman sa pulisya ni Purok Leader Flaviano Mediona, Jr. ng Brgy. 176, Bagong Silang, si Mirasol ay sangkot sa kalakaran ng iligal na droga at kabilang din ito sa barangay at police drug watchlist. RENE MANAHAN

DAHIL sa hindi umano nagbigay ng P20 sa isang lalaki, isang tricycle driver ang pinatay sa saksak kagabi sa Tondo, Maynila.

Kinilala ang biktimang si Rowell Luna, 34, ng 883 Area-A, Gate 3, Parola Cmpd., Tondo, habang nakatakas naman ang suspek na si Diosdado Alvero, alyas ‘Baga,’ nasa edad 50-pataas, ng 615 Gate 3, Parola Cmpd.

Dakong 9:30 ng gabi nang maganap ang krimen sa MICP Rd., harapan ng Gate 3, Parola.

Bago ito, nilapitan ng suspek ang biktima habang naghihintay ito ng pasahero at hiningan ng P20.

Tumanggi naman umano ang biktima at sa halip ay tumatawang niyakap pa ang suspek.

Ikinainsulto naman ng suspek ang ginawa ng biktima kaya’t galit na galit na umuwi ito ng bahay at kumuha ng patalim na may habang 12-pulgada.

Kaagad din nitong binalikan ang biktima at walang sabi-sabing tinarakan nang dalawang beses sa katawan, saka mabilis na tumakas.

Isinugod naman ng kanyang kapwa tricycle driver na si Alvin Briones, na nakasaksi sa krimen, ang biktima sa Gat Andres Bonifacio Memorial Medical Center ngunit nasawi rin habang ginagamot dakong 10:48 ng gabi.

Patuloy namang pinaghahanap ng mga pulis ang suspek upang panagutin sa krimen. JOCELYN TABANGCURA-DOMENDEN

NASA 30 stay-in na empleyado ng isang supermarket ang nailigtas sa naganap na sunog kaninang umaga sa Paco, Maynila.

Ayon sa Bureau of Fire Protection (BFP) sa Maynila, nagsimula ang sunog alas-5:39 ng umaga sa may storage room sa ikalawang palapag ng 4-storey building ng Cligan Supermarket kung saan may nakatambak na mga alak.

Nasugatan naman sa naturang sunog ang bumberong si
FO3 Marlon Podolig na nagtamo ng first-degree burn sa ilong.

Tumagal ang sunog nang apat na oras bago nakontrol alas-10:30 ng umaga dahil s malaking apoy at makapal na usok.

Samantala, agad namang inalerto ng pamahalaang lungsod ng Maynila ang emergency units ng lungsod upang sumaklolo sa nagaganap na sunog.

Isinara rin ng Manila Traffic and Parking Bureau (MTPB) ang kahabaan ng Angel Linao St., mula Pedro Gil hanggang Nakpil kung saan nagpadala si Manila Traffic and Parking Bureau (MTPB) chief Dennis Alcoreza ng mga traffic enforcer sa lugar upang asistihan ang mga motorista.

Una nang sinabi ni Estrada na iuutos niyang muli ang pag-iinspekyon sa mga medium at high-rise na mga gusali sa lungsod upang matiyak na sila ay sumusunod sa fire safety regulations.

Bunsod ito ng sunog na tumama sa 12-palapag na Binondo Terrace condominium sa Binondo nitong Setyembre 7 na ikinasawi ng isang residente. JOCELYN TABANGCURA-DOMENDEN