PUTOL ang paa ng isang 15-anyos na estudyante nang masagasan ng tren ng Philippine National Railway (PNR) kaninang umaga sa Sampaloc, Maynila.

Kinilala ang biktimang si John Genesis Munsayac, nag-aaral sa TESDA accredited school sa may Pritil, Tondo.

Sa inisyal na ulat, papasok ang biktima sa naturang paaralan nang maisipang dumaan sa riles ng tren.

Ayon sa ilang residente sa lugar, naka-earphones ang biktima kaya posibleng hindi nito narinig ang busina ng tren.

Dahil dito, nakaladkad pa nang may 150 metro ang biktima na nagresulta para maputol ang kaliwa niyang paa sa kahabaan ng Antipolo St., Sampaloc, Maynila.

Patungong Tutuban ang tren ng PNR nang mangyari ang insidente. JOCELYN TABANGCURA-DOMENDEN

ISINAILALIM na sa inquest proceedings ang lalaking nagpakilalang empleyado ng gobyerno na nag-amok sa MPD headquarters matapos maaresto kahapon.

Si Arvin Tan ay naaresto sa kanyang bahay sa New Manila, Sta. Mesa.

Sinampahan ng kasong malicious mischief, damage to property, resisting arrest at unjust vexation ang suspek.

Isasailalim din sa drug test at phychiatric test ang suspek makaraang mapag-alaman sa kanyang kaanak na may iniinom itong gamot at wala rin sa katinuan nang siya’y arestuhin ng pulisya.

Nagtamo ng tama ng bala sa likuran bahagi ng katawan si Tan nang paputukan ito ng mga pulis nang paharurutin ang kanyang sasakyan at sagasaan ang mga miyembro ng media.

Narekober din sa kanyang bahay ang ginamit na sasakyan kung saan putok ang gulong at may tama rin ng bala. JOCELYN TABANGCURA-DOMENDEN

KINUMPIRMA kahapon ng Bureau of Immigration (BI) sa Ninoy Aquino International Airport (NAIA) na nakaalis na ng bansa noong Martes ng madaling-araw ang isa sa mga suspek sa pagkamatay ng UST law student Horacio Castillo III dahil sa hazing.

 Ayon kay BI Port Operations Division chief Red Marinas, walang pumigil kay Ralph Cabales Trangia, 22, nang sumakay ito ng EVA Air flight BR262 patunong Chicago, USA dakong ala-1:53 ng madaling-araw.

Aniya, pinayagan nilang makaalis ang suspek dahil wala pa ito sa watch list order. Dagdag pa nito na natanggap nila ang inisyung Immigration Lookout Bulletin Order (ILBO) noong Miyerkules ng ala-una ng hapon.

 Si Trangia, kasama ang amang si Antonio, at isa pang UST law student na si John Paul Solano ay pinaghahanap ng pulisya sa pagkakasangkot nila sa hazing na ikinamatay ni Castillo.

Batay sa police report, pag-aari umano ng matandang Trangia ang sasakyang ginamit sa pagdala ng katawan ni Castillo. BENNY ANTIPORDA

ISANG binata ang binawian ng buhay nang pagbabarilin ng di kilalang salarin habang nakikinig ng musika sa loob ng nakaparadang tricycle ng kanyang kaibigan sa Sta. Cruz, Maynila kaning madaling-araw.

Sugatan naman ang isang lolo nang tamaan ng ligaw na bala habang mahimbing na natutulog sa loob ng kanyang tricycle.

Namatay habang ginagamot sa  Jose Reyes Memorial Medical Center ang biktimang si Edwin Simapao, 25, ng 1816 Avenida Avenue, sa Sta. Cruz habang patuloy pa ring ginagamot sa naturan ding ospital si Samuel Plagata, 65, na residente rin ng nasabing lugar.

Sa imbestigasyon ni SPO1 Charles John Duran, ng Manila Police District (MPD)- homicide section,  nabatid na dakong 1:55 ng madaling-araw nang maganap ang krimen sa harapan ng isang fastfood chain sa Claro M. Recto Avenue kanto ng Avenida Avenue sa Sta. Cruz.

Sa salaysay sa pulisya ng testigong si John Jeward Garcia, 21, tricycle driver, nabatid na bago ang krimen ay nakikinig ng musika sa kanyang nakaparadang tricycle ang biktima, habang siya naman ay bumibili ng sigarilyo sa kalapit na tindahan.

Nagulat na lamang aniya ito ng makarinig ng putok ng baril kaya’t kaagad na nagtago sa pangambang tamaan siya ng ligaw na bala.

Agad din namang lumabas ito sa kanyang pinagtataguan kung saan dito na nakitang duguan ang biktima.

Kaagad naman umanong pinaandar ni Garcia ang kanyang tricycle at isinugod ang biktima sa pagamutan ngunit idineklara na itong patay ng mga doctor dakong 3:09 ng madaling-araw dahil sa mga tama ng bala sa katawan.

Ayon naman kay Plagata, natutulog siya sa loob ng kanyang tricycle nang makarinig ng mga putok ng baril at minalas na tamaan ng ligaw na bala sa kanyang hita. Humingi umano siya ng tulong sa mga bystander sa lugar para maisugod siya sa pagamutan upang malapatan ng lunas.

Patuloy naman ang imbestigasyon ng pulisya upang matukoy ang pagkakilanlan ng suspek at motibo nito. JOCELYN TABANGCURA-DOMENDEN

DALAWA ang namatay nang lamunin ng lupa ang kanilang bahay sa Cebu City nitong Huwebes ng gabi.

Ang bangkay ng mga biktima na nakilalang sina Elpidio Heraga, 64, at Juvelyn Salipa, 31, ay nakuha sa ilalim ng mga bato na mula sa kanilang nawasak na bahay sa tabi ng ilog.

Sa ulat, naganap ang insidente dakong 8:45 p.m. isang residential area sa Guadalupe River sa Sitio Lower Ponce, Barangay Capitol Site, Cebu City.

Ayon sa awtoridad, nagpapahinga ang mga biktima nang biglang matabunan ng lupa ang kanilang bahay.

Inabot ng mahigit sa apat na oras bago nakuha ng rescue operation team ang bangkay ng mga biktima.

Samantala, nailigtas naman ng rescuers ang  18 katao, 10 sa kanila ay menor de edad, mula sa landslide sa sanhi ng malakas na  pagbuhos ng ulan nitong Huwebes ng hapon, ayon pa sa ulat.

Nawasak din ang mga bahay ng mga nasagip na mga biktima at ngayon ay pansamantalang tumutuloy sa barangay hall. BOBBY TICZON

DINISMISS na ng Department of Justice (DOJ) ang kasong rape at attempted rape na isinampa ng model-stylist Deniece Cornejo laban sa actor-television host na si Vhong Navarro.

Sa isang review resolution na petsa  September 6, walang nakita ang DOJ ng  probable cause o matibay na ebidensya para isampa ang kaso laban kay Navarro sa korte.

 “To be sure, the voluminous records of this case was scrutinized vis-à-vis the original resolution finding probable cause. However, such thorough scrutiny has failed to make us engender a well-founded belief that the rape and attempted rape described by the complainant actually happened,” pahayag sa  resolution na pirmado ni OIC Prosecutor General Severino Gaña Jr.

Sa reklamo ni Cornejo, inabuso siya ni  Navarro noong Enero 17, 2014 at limang araw ang nakalipas o noong Enero January 22,  pinaggugulpi ang aktor ng grupo ng negosyanteng si Cedric Lee, na nagresulta para ma-ospital si Navarro sanhi ng tinamong kapansanan sa iba’t ibang bahagi ng katawan.

Depensa ni Lee na kaya nila ginulpi si  Navarro dahil naaktuhan nila itong tinatangkang gahasain si Cornejo.

 Itinanggi ni Navarro ang alegasyon, at sa pamamagitan ng DOJ, isinampa nito sa Taguig City court ang kasong serious illegal detention at grave coercion laban kay Cornejo, Lee, at limang iba pa na may koneksyon sa mauling incident. BOBBY TICZON

KASAMA na sa listahan ng mga pangunahing suspect si Tomas Bagcal, ang taxi driver na nagsabing hinoldap umano siya nina Carl Angelo Arnaiz at Reynaldo de Guzman alyas “Kulot” bago sila napatay ng mga pulis.

“Sinama po si Tomas Bagcal as a principal (suspect) by direct participation in the killing of the two,” pahayag kaninang Biyernes ng umaga ni Justice Sec. Vitaliano Aguirre.

Ayon kay Aguirre, sinampahan ng kaso si Bagcal matapos nitong sabihin na kutsilyo ang ginamit nina Arnaiz at De Guzman sa panghoholdap, ibang-iba sa nauna niyang pahayag na baril ang dala ni Arnaiz ng gabing napatay ito.

Nagpabago-bago ang salaysay ni Bagcal matapos lumutang ang isang bagong testigo na nakita umanong magkakasama sina Arnaiz, de Guzman alyas “Kulot,” Bagcal at ang mga pulis-Caloocan.

Ayon sa testigo, sakay ni Bagcal sa harapan si Police Officer 1 Jefrey Perez, at sa likod naman ng taxi ay magkatabi ang 14-anyos na si De Guzman, 19-anyos na si Arnaiz at isa pang lalaki.

Ilang saglit ay nakarinig na ang testigo ng dalawang putok ng baril.

Nang sundan niya ang pinanggalingan ng putok, nakita niyang may nakabulagta sa damuhan at nandoon din si Bagcal, Perez, iba pang mga pulis na nakasibilyan at mga barangay tanod.

Tumanggi munang humarap sa camera ang testigo, pero ayon sa kanya, handa siyang magsalita at tumulong sa imbestigasyon basta’t mabibigyan siya ng proteksyon. BOBBY TICZON

DALAWANG testigo sa pagkamatay sa hazing victim na si University of Sto. Tomas law freshman Horacio Castillo III ang lumapit sa Department of Justice (DOJ), ayon kay Justice Sec. Vitaliano Aguirre II.

Sinabi ni Aguirre na isa sa mga testigo ay miyembro ng Aegis Jvris fraternity, habang ang isa naman ay hindi kabilang sa grupo ngunit maraming nalalaman ukol sa pagkamatay ng binata.

“Natatakot sila. Baka daw pagpunta nila sa NBI (National Bureau of Investigation) maraming makakilala sa kanila kaya dumiretso sa akin,” saad ni Aguirre.

Dagdag ng kalihim, makikipag-ugnayan ang NBI sa Interpol para matunton ang kinaroroonan ni Ralph Trangia, isa sa mga pangunahing suspek sa pagkamatay ni Castillo na nakalabas na ng bansa.

“Sign of guilt ‘yung mabilisan niyang paglabas ng bansa matapos ang insidente… Magiging fugitive of justice siya,” ani Aguirre.

Ipinapakansela na rin ng Philippine National Police (PNP) sa Department of Foreign Affairs (DFA) ang pasaporte ni Trangia.

Ayon sa Bureau of Immigration (BI), lumipad papuntang Taiwan si Trangia noong Martes, isang araw matapos pumutok ang balita ukol sa pagkamatay ni Castillo.

Ito’y bago pa nailagay si Trangia at 15 pang miyembro ng fraternity sa immigration lookout bulletin noong Miyerkules.

Si Castillo, 22, ay namatay sa initiation rites ng Aegis Jvris fraternity noong nakaraang Sabado dahil sa atake sa puso bunsod ng dinanas na pagpapahirap.

Dinala ito sa Chinese General Hospital noong Linggo ngunit idineklarang dead-on-arrival. BOBBY TICZON

MAHIGIT 30 baril ang nasamsam ng National Bureau of Investigation (NBI) sa bahay ng isang dating hepe ng Negros Police Regional Intelligence Unit.

Bukod sa nasabing mga baril, nakuha rin kay SPO1 Joshua Barile, ang apat na high powered hand grenade at isang sachet pinaniniwalaang shabu sa storage room sa kanyang bahay sa Bacolod City.

Dating hepe ng Negros Police Regional Intelligence Unit si Barile at ngayon ay pinamumunuan naman ang  firearms ang explosive Section  ng regional civil security unit 18.

Ang nasabing mga baril ani Barile ay nakadokumento lahat pati ang baril ngunit ang nakuhang droga at isa pang granada ay planted umano.

Sinabi rin ni Barile na ang hawak niya ay for safekeeping lamang na ebidensya sa korte.

Naniniwala si Barile na pakana lamang ng isang pulitiko ang raid kung saan sinalakay na rin umano ilang taon na ang nakalilipas.

Itinanggi naman ni Barile ang paratang na dati na itong nasangkot sa pagpatay at droga. JOCELYN TABANGCURA-DOMENDEN

PATAY ang 32-anyos na tricycle driver nang pagbabarilin ng mga hindi nakilalang lalaki kaninang umaga sa Tondo, Maynila.

Idineklarang dead on arrival sa ospital ang biktimang si Jaymark Carillo nakataira sa Raxabago St.,  Tondo.

Sa imbestigasyon ng pulisya, dakong alas-5:16 ng umaga nang maganap ang krimen sa kanto ng Dagupan Extension at Raxabago.

Nauna rito, naghihintay ng maisasakay na pasahero ang biktima nang lapitan ito ng isang motorsiklo sakay ang dalawang lalaki na pawang nakatakip ang mukha.

Dito na nagpaputok ang angkas ng motorsiklo ng apat na beses bago tuluyang humarurot patungong Tiuseco Street.

Inamin naman ng kaanak ng biktima na dating gumagamit ng droga ang biktima ngunit matagal na ito ng tumigil.

Sinabi naman ng ilang opisyal ng barangay sa kanilang lugar na wala itong rekord sa pagkakasangkot sa iligal na droga. Patuloy pang inaalam ng pulisy ang pagkakilanlan ng mga suspek at motibo sa krimen. JOCELYN TABANGCURA-DOMENDEN

PATAY ang dating hepe ng PNP-Highway Patrol Group sa Central Luzon at anak nito matapos silang tambangan ng mga hindi pa nakikilalang mga salarin sa Mariveles, Bataan, Lunes ng hapon.

Kinilala ang mga napatay na sina Napoleon Cauayan, retiradong hepe ng HPG-Central Luzon, at ang 21-anyos na anak nitong si Napoleon Christopher.

Sa inisyal na imbestigasyon, magkasamang dumating sa isang sabungan sa bayan ng Mariveles ang mag-ama lulan ng isang pribadong sasakyan.

Matapos iparada ang sasakyan, magkasabay na naglakad ang mag-ama papasok ng sabungan.

Gayunman, ilang hakbang pa lamang mula sa sasakyan ay bigla na lamang pinaulanan ng bala ng hindi bababa sa tatlong armadong salarin ang mga biktima.

Nang tuluyang bumulagta ang mga biktima ay tuluyang tumakas ang mga gunman.

Nagpapatuloy ang pagkalap ng ebidensya ng mga imbestigador sa pagkakakilanlan ng mga salarin at posibleng mastermind sa pagpatay sa mag-ama. JOHNNY ARASGA

ISA ang patay habang nadamay naman ang isa pa nang barilin ng dalawang lalaki lulan ng motorsiklo ang isang mekaniko sa Sampaloc, Maynila.

Namatay noon din ang biktimang si Ervee Bugarin, 37, ng 1093 Leyte St., Sampaloc, Maynila matapos magtamo ng tama ng bala sa katawan.

Ginagamot naman sa Ospital ng Maynila si Edrecil Reyes Diazon, 26, ng 1850 G. Tuazon St., Sampaloc sanhi ng tama ng ligaw na balan

Nakatakas naman ang mga suspek na ngayon ay patuloy na inaalam ng pulisya ang kanilang pagkakakilanlan.

Sa ulat ni SPO3 Richard Escarlan ng Manila Police District Homicide Section, dkaong 3:30 ng hapon nang maganap ang insidente sa tapat ng Exreme works sa G. Tuazon cor. Mindoro St., Sampaloc Maynila.

Nabatid na abalang gumagawa ng motorsiklo ang biktima sa pinangyarihan habang katabi si Edrecil nang sumulpot ang hindi nakilalang salarin at walang sabi-sabing pinaputukan ang biktima.

Kasunod nito, ilang concern citizen ang nagtakbo kay Edrecil na ngayo’y nilalapatan ng lunas.

Gayunman, patuloy na nagsagawa ng imbestigasyon ang pulisya hinggil sa nasabing insidente. JOCELYN TABANGCURA-DOMENDEN

NAKUWELYUHAN sa Ninoy Aquino International Airport (NAIA) ang isang Pinoy na hinihinalang terorista na galing sa Jeddah, Saudi Arabia.

Sa ipinadalang ulat ng Bureau of Immigration (BI) sa Department of Justice (DoJ), nakilala ang suspek na si Abdulpatta Escalon Abubakar.

Ayon sa BI, lumabas sa secondary inspection ng awtoridad na kasama si Abubakar sa mga hinihinalang terorista na sumusuporta sa isang local terrorist group.

Si Abubakar ay itinuturing ng PNP-Intelligence Group at ng US Embassy na person of interest.

Hawak na ngayon ang suspek ni P/Supt. Romeo Daqis ng PNP Counter Terrorism Group (CTG) para sa isailalim sa interogasyon.

Sakay si Abubakar ng Philippine Airlines Flight PR 633 mula Saudi Arabia nang mahuli ng awtoridad. BOBBY TICZON

PINAGBABARIL ng kilabot na riding-in-tandem ang deputy chief of police ng Polomolok Municipal Police Station sa South Cotabato, nitong Martes ng gabi.

Dead-on-the-spot sanhi ng tama ng bala sa iba’t ibang bahagi ng katawan ang biktimang si S/Insp. Hernan Gabat.

Sugatan naman ang kasama ng biktikma na hindi nakuha ang pangalan habang may ilan din ang tinamaan ng ligaw na bala.

Wala pang ideya ang pulisya kung sino ang nasa likod ng pag-atake pero isa sa sinisilip na motibo ay may kaugnayan sa trabaho ng biktima.

Nangyari ang insidente, dakong 1045 p.m. sa isang restaurant sa Polomol, South Cotabato.

Ayon sa mga nakasaksi, maraming putok mula sa armalite rifle ang kanilang narinig na ipinutok ng mga suspek na sakay ng motorsiklo. BOBBY TICZON

ISANG construction worker ang nasa malubhang lagay matapos saksakin sa harap ng kanyang live-in partner at kapatid ng isang lasing na driver kagabi, Sept. 27, sa Malabon City.

Ayon kay Malabon police duty desk officer S/Insp. Christopher Millares, si Johnny Gabriel, 31, ng No. 63 Feliciano St., Brgy Arkong Bato, Valenzuela City, ay nagtamo ng isang malalim na saksak sa tiyan na agad namang dinala kanyang live-in partner na si Gina Macasaya, 21, sa Valenzuela General Hospital kung saan ito patuloy na inoobserbahan.

Sa isinagawang imbestigasyon ni PO2 Virgilio Agustin, bumibili ng barbecue ang biktima kasama ang kanyang live-in partner at kapatid sa harap ng videoke bar sa M.H. Del Pilar at kinompronta ng suspek na si John Henry Aquino, 28, pasado alas-11:45 ng gabi.

Lasing ang suspek at sa hindi malamang dahilan ay nagalit ito at sinabing “Pulis ako. Gusto ninyo barilin ko kayo?”

Dahil dito, agad umawat ang may-ari ng videoke bar at inilabas ito sa nasabing tindahan.

Matapos na makuha ng biktima ang kanilang order ay naglakad na ito pauwi ngunit sinundan naman ng suspek at walang sabi-sabing sinaksak nang isang beses ang biktima saka mabilis na tumakas patungong Brgy. Arkong Bato sa Valenzuela City.

Sa isinagawang follow-up operation ng mga tauhan ng (PCP) 1 sa pakikipagtulungan ng Valenzuela Police, naaresto ang suspek sa kanilang bahay sa 604 Industrial Rd., Brgy. Arkong Bato. ROGER PANIZAL

NAPATIMBUWANG ng pulisya ang isang lalaking nangholdap sa isang pampasaherong bus matapos kumasa sa pulisya sa Quezon City kaninang Huwebes ng madaling-araw.

Wala pang pagkakakilanlan ang napatay na suspek na nakuhanan ng isang 9mm, anim na cellphone at isang silver na kwintas na pinaniniwalaang pag-aari ng ilan sa mga pasahero ng bus.

Nahuli naman ang isa pang suspek na nakilalang si CJ Tarroga habang nakatakas naman ang dalawa pang kasamahan nito.

Sa ulat, naganap ang insidente dakong 12:55 a.m. sa kanto ng EDSA at Whiteplains.

Ayon kay Supt. Wilson delos Santos, hepe ng Quezon City Police Station 12, sumakay sa Ayala ang apat na holdaper at pagsapit sa may Corinthians Subd. ay nagdeklara ng holdap.

Nagkataon namang rumoronda ang mga pulis at nakita ang apat na suspect na may mga bitbit na bag at kahina-hinala pa ang kilos.

Nang lapitan para sitahin, nakipagbarilan sa mga pulis ang mga suspek na nagresulta sa pagkamatay ng isa at pagkahuli sa isa pa. BOBBY TICZON

NAGKALASOG-LASOG ang katawan at naputol pa ang kanang kamay ng isang estudyante ng De La Salle-College of St. Benilde matapos mahulog mula sa ika-20 palapag ng isang condominium kaninang Biyernes ng madaling-araw sa Malate, Maynila.

Kinilala ang biktimang si Javier Villareal, 20, huling nanunuluyan sa Unit 3829 Manila Residences Tower II sa 2310 Taft Ave., Malate, Maynila.

Sa ulat ni SPO3 Charles John Duran, imbestigador ng MPD-Homicide Section, alas-1:45 ng madaling-araw nang maganap ang insidente sa ika-20 palapag ng Unit 2041 ng nasabing condominium.

Nabatid na masayang nag-iinuman ang biktima at ilang kaibigan nito nang maisipang magtungo sa balcony ng Unit 2014 na sinundan naman nina Jeremiah Dave San Juan at Ann Therese Gabunada at nakitang tumayo ito sa isang stool.

Sinita naman nila agad ito ngunit muling tumayo sa sa stool malapit sa balcony si Villareal dahilan upang mawalan ng balanse at tuluyang bumulusok pababa.

Agad ipinagbigay-alam ng mga kaibigan ng biktima ang nangyari sa mga staff ng condominium na siya namang nag-report sa pulisya.

Patuloy naman ang imbestigasyon ng pulisya kung may naganap na foul play sa insidente. JOCELYN TABANGCURA-DOMENDEN

AMULUNG, TUGUEGARAO CITY – Patay ang limang katao habang 24 ang sugatan matapos magsalpukan ang dalawang pampasaherong van sa kahabaan ng Brgy. Baculud, Amulung sa nasabing siyudad kahapon, October 1.

Kinilala ng Tuguegarao City police ang mga namatay na sina Reynalda Tolentino, Marivic Battung, Hemelita Cadiz, pawang mga residente ng bayan ng Baggao na sakay sa Isuzu passenger van na minamaneho ni Rustom Bartolome na sugatan sa nasabing insidente.

Dead-on-arrival din ang dalawang pasahero ng Toyota Hi-Ace van na minamaneho ni Mario Danao, ng Brgy. Redondo, Iguig, na sina Erlinda Doran at Floraida Sales, kapwa ng Alcala, Cagayan

Samantala, sugatan naman ang nasa 24 pasahero ng dalawang sasakyan na kinabibilangan ng dalawang driver na nilalapatan ng lunas sa ospital.

Ayon sa pulisya, sinabi ni Bartolome na pumutok ang gulong sa likod ng kaniyang minamanehong van na papuntang bayan ng Baggao mula sa lungsod ng Tuguegarao.

Dito nawalan umano siya sa kontrol sa manibela kaya pumasok ito sa kabilang linya at bumangga sa kasalubong na van na papunta sa Tuguegarao mula naman sa bayan ng Aparri.

Nayupi ang tagilirang bahagi ng van na minamaneho ni Bartolome habang wasak ang harapang bahagi ng van ni Danao.

Nagtamo ng head and body injuries ang mga namatay habang nagtamo naman ang iba ng iba’t ibang sugat sa katawan. ALLAN BERGONIA

POSITIBONG itinuro ng dalawang saksi ang mga pulis na pumatay kay Carl Angelo Arnaiz, dating Iskolar ng Bayan sa University of the Philippines (UP) habang nakaluhod ang biktima at nakataas ang kamay.

Sa kanilang pagtestigo sa ginanap na pagdinig ng Senate committee on public order sa pamumuno ni Sen. Panfilo Lacson, positibong itinuro sina PO1 Jeffrey Perez at PO1 Ricky Arquilita bilang killer ni Arnaiz.

Iniimbestigahan ni Lacson ang sunod-sunod na pagpatay sa mga kabataan sanhi ng giyera laban sa droga na karamihan na nabibiktima ay menor-de-edad at walang nahuhuling “malalaking isda.”

Samantala, itinanggi naman S/Supt. Chito Galvez Bersaluna, hepe ng Caloocan City Police Station nang mangyari ang insidente, na personal nyang kilala sina Perez at Arquilita na siyang itinuturong pumatay kay Arnaiz.

“During that time I have 1,200+ na personnel so ‘di ko po gaano pa ma-familiarize ‘yung buong tao your honor. ‘Di ko po personal na kilala your honor,” sagot ni Bersaluna sa tanong ni Senador Grace Poe.

Sa pagdinig, sinabi nina Tomas Bagcal, taxi driver na sinasabing hinoldap ni Carl na kitang-kita niya na nakaluhod ang biktima at nakaposas nang barilin ito hanggang mamatay.

Sinabi ni Bagcal na hinoldap siya ni Arnaiz at isa pang kabataan.

“Pinagbabaril po iyong holdaper at nakaluhod siya,” ayon kay Bagcal ngunit hindi tinukoy kung ano ang nangyari sa kasama nitong kabataan.

Itinanong naman ni Poe kay Bagcal kung nadinig niya ang huling salita ni Carl na nagmamakaawa bago siya barilin ng dalawang pulis.

“Malayo po ako. ‘Yung hitsura lang po nya, nakaluhod na nakataas ‘yung kamay,” ayon kay Bagcal.

Kinumpirma naman ng isa pang saksi, si Joe Daniel na nakita niyang nakaluhod ang biktima habang binabaril ng dalawang pulis.

“Nakita ko ‘yung mukha nung lalaki. Nakakaawa ‘yung mukha nya,” na tumutukoy kay Carl.

“Nakatakbo na po siya sa damuhan and then nakaluhod po siya noong binaril na may posas,” dagdag ng saksi.

Sa pagtatanong ni Poe, positibong itinuro nina Bagcal at Daniel sina Perez at Arqulita na siyang bumaril sa biktima. ERNIE REYES