SA pamamagitan ng sinturon, isang American national na pedopilya ang nagbigti sa loob ng kanyang selda sa Cebu kaninang Miyerkules ng madaling-araw.

Sinabi ni National Bureau of Investigation (NBI)-7 Regional Director Patricio Bernales, nakita na lamang ang suspek na nakilalang si Jessie Goldenfenni, alyas Jamie Patterson, JP o Daddy at tubong Massachusetts, USA, na wala ng buhay sa loob ng kanyang selda at nagbigti gamit ang kanyang sinturon.

Bago ang insidente, hinuli si Goldenfenni matapos makatanggap ng reklamo ang NBI tungkol sa pagmomolestya ng mga bata sa kanyang sasakyan kapalit ng manika o teddy bear.

Paliwanag ni Bernales, dadalhin ni Goldenfenni ang mga bata sa kanyang bahay sa isang subdivision sa Lungsod ng Talisay sa Cebu at doon ay paghuhubarin saka uutusang laruin ang kanilang pribadong parte ng katawan sa harap ng camera.

Nabatid na umabot na sa limang menor-de-edad ang nabiktima ng banyaga at palipat-lipat ito ng bansa kagaya sa Vietnam at Nicaragua.

Sa ngayon ay ipinoproseso na ng mga awtoridad ang dokumento ng dayuhan upang maipadala ang bangkay nito pabalik sa kanyang bansa. BOBBY TICZON

KINATAY ng isang selosong mister ang kanyang misis sa Cebu City kaninang Huwebes ng madaling-araw.

Nagtamo ng mga saksak sa iba’t ibang bahagi ng katawan at namatay noon din ang 40-anyos na biktima na hindi pinangalanan.

Hinahanting na ngayon ng pulisya upang panagutin sa krimen ang mister ng biktima na sadyang hindi pinangalanan.

Sa ulat, nadiskubre ang ang bangkay ng biktima na malapit sa bahay nito sa Brgy. Guba.

“Paglabas ko nakita ko mga gamit ni mama. Sa unahan nakita ko na siyang duguan,” kwento ng anak na itinago sa pangalang “Boy”.

Huli umanong kasama ng biktima ang kanyang tatay, na kasalukuyang hindi mahagilap at itinuturing na person of interest ng pulisya.

Natagpuan malapit sa bangkay ang isang duguan na damit na ayon sa anak ay pagmamay-ari ng kanyang ama.

Ayon kay SPO1 Winston Ybañez, imbestigador ng Cebu City Police Office, isa sa mga tinitingnang motibo sa pananaksak ay selos dahil madalas umanong nagtatalo ang mag-asawa hinggil sa pagkakaroon nito ng ibang karelasyon na itinanggi naman nito. BOBBY TICZON

MAY 14 kilo ng shabu na halagang P112-milyon ang nakumpiska ng Ozamiz City police sa isinagawang serye ng drug operations sa Misamis Occidental nitong Miyerkules.

Sinabi ni C/Insp. Jovie Espenido, Ozamiz City police chief, na ang nakumpiskang droga ay lumang stocks ng pamilya Parojinog, na ang ilan sa mga miyembro ay kundi napatay ay naaresto kasunod ng madugong pre-dawn drug raid na nagiwan ng 15 patay kabilang ang patriyarka ng Parojinog family.

“Lumang supply iyan, pagdating ko sa Ozamiz tinago nila. Ngayon lang inilabas dahil nakita nila, na naghahanap sila ng pera at patay na yung papa nila,” pahayag ni Espenido.

“According sa nakuha naming information up to 86 kilos iyan last year. ‘Yung transaksyon nila, ‘yung taga-Cebu, magpupunta sa Ozamiz, sakay lang ng barko. Ganundin ‘yung taga-Lanao, taga-General Santos,” kwento pa nito.

Nauna nang sinabi ng kapulisan na nasabat nila ang may P32 milyon halaga ng suspected shabu mula sa isang nagngangalang Butch Merino sa hiwalay na anti-illegal drug operations na inilatag nitong Miyerkules.

Si Merino ay dating tsuper at bodyguard ng nakakulong na si Ozamiz Vice Mayor Princess Nova Parojinog.

Sinabi ng pulisya na si Merino ay nahuli sa isang checkpoint at nakarekober sa kanya ng isang kilo ng shabu na halagang P8-milyon, isang firearm, at dalawang magazine.

Sinabi ni Espenido na ang supplier ni Merino ay isang nagngangalang Melden Rabarez, na nadakip sa isang entrapment operation kasama ang isang Roselyn Walohan.

Isa pang kilo ng shabu at cash na mahigit na P27 milyon ang nakuha naman mula kay Rabarez.

Ang shabu aniya na kanilang nakumpiska ay nakakasang kunin ng isang distributor sa Lanao.

Ayon naman kay C/Insp. Cipriano Bazar, Jr., acting head ng Regional Tactical Operations Center, nagsagawa ang Ozamiz City police ng isang simultaneous serving ng search warrant nitong Miyerkules ng gabi na humantong sa pagdakip kay Melodin Malingin at Gaudencio Malingin, kilalang supporters ng mga Parojinogs.

Gayunman, ang iba pang suspek na nakilalang sina Maychell Parojinog Gumapac, Manuelito Francisco, Rizalino Francisco, June Francisco, Ricardo Parojinog, at Christopher Parojinog ay nananatiling nakakalaya.

Nakumpiska sa bahay ng Malingins ang walong kilo ng shabu na nakalagay sa walong plastic bags at nakarolyo sa aluminum foil.

Narekober naman sa bahay ni Gumapac ang dalawang kilo ng shabu na nakalagay sa dalawang plastic bags, isang unit steel vault, isang airsoft rifle, at isang long magazine.

Habang nakumpiska sa bahay ng mga Francisco ang 1 M4 Boost Master, 3 short M16 magazine, 1 bandoler, 90 piraso ng live ammunition ng M16, 2 rifle grenade launchers, 3 live ammunition ng M203 at 20 empty cartridges ng M16.

Samantala, narekober sa bahay ng Parojinog ang 1 M16 rifle, 1 steel short magazine, 19 live ammunition ng 5.56 caliber, at 1 hand grenade.

Sinabi ni Espenido na nakatanggap siya ng impormasyon na si Vice Mayor Parojinog ay may alam pa rin sa umano’y drug transactions kahit siya ay nakakulong sa PNP Custodial Center. BOBBY TICZON

BAGSAK sa kulungan ang isang pedicab driver matapos ireklamo ng pananakit sa kanyang 76-anyos na ama at pag-alipusta at pagmumura sa barangay tanod kagabi, Dec. 8, sa Brgy. Santulan, Malabon City.

Kinilala ni Malabon police head of investigation Insp. Paul Dennis Javier ang suspek na si Rogelio Nieves, 49, ng 232 E. Martin St/, Brgy. Santulan.

Sa pinagsamang imbestigasyon nina SPO1 Rolando Hernando at PO3 Randy Billedo, dakong 11:45 ng gabi nang dumating sa kanilang bahay ang lasing na suspek at kinompronta ang kanyang amang si Romeo, 76, biyudo, bago pinagmumura.

Nauwi ang mag-ama sa mainitang pagtatalo hanggang sa itulak ng suspek ang kanyang ama na naging dahilan upang magkaroon ng mga galos sa katawan ang biktima.

Nasaksihan ang insidente ni Threresa Laxa na agad humingi ng tulong sa mga barangay tanod na mabilis namang rumesponde at inaresto ang suspek.

Nang nasa loob sila ng barangay hall ay pinagmumura ng suspek ang mga umarestong tanod kaya pinosasan ito bago dinala sa himpilan ng pulisya at sinampahan ng kasong slight physical injury at alarm and scandal. ROGER PANIZAL

BAGO mabasabak muli sa drug war, inanunsyo ng Philippine National Police (PNP) kaninang Biyernes ng umaga na magbabalsa sila ng kanilang mga opisyal.

Papalitan ni S/Supt. Albert Ferro ng Firearms Explosive Division si C/Supt. Joseph Adnol bilang hepe ng PNP Drug Enforcement Group (PDEG) simula sa Disyembre 11.

Si Ferro ay dating hepe ng nalusaw na PNP Anti-Illegal Drugs Group.

“As of now, I’m just waiting for guidance, but of course, on my part, I expect anything that will happen. I’m hopeful na it’s all for the better, always for the Philippine National Police,” pahayag ni Adnol.

Nitong nakaraang Huwebes, matamlay ang naging opinyon ni Adnol tungkol sa iminungkahi na gumamit ang police ng body cameras sa kanilang operasyon.

Habang handa ang PNP na bigyan ang mga operatiba ng body cameras, sinabi ni Adnol na dapat pagkatiwalaan ng publiko ang awtoridad dahil nag-ooperate sila kasama ang Panginoon bilang kanilang camera.

Nanniniwala naman si Adnol na ang kanyang pahayag ay walang kinalaman sa kanyang pagkakasibak.

“I do believe it’s because of the movement that’s ongoing in the organization to reposition officers [with] the retirement of the other officers in the organization,” pahayag nito.

Nagsilbi si Adnol bilang Deputy Regional Director for Administration ng Northern Mindanao bago ang umupong PDEG director nitong nakaraang Oktukbre.

Maliban kay Adnol, ang mga sumusunod na opisyal ay inilipat din ng ibang assignment ay sila Director Manuel Felix, hepe ng Directorate for Integrated Police Operations (DIPO) sa Western Mindanao, na malilipat sa Office of the Chief PNP sa Camp Crame.

Si C/Supt. Cedrick Train, Chief ng PNP Soccsksargen, na siyang magiging bagong hepe ng DIPO Western Mindanao.

Si C/Supt. Marcelo Morales, chief ng Maritime Group ay papalitan si Train sa PNP regional office sa Soccsksargen.

Si C/Supt. Rodelio Jocson naman na Director of Information Technology Management Services (ITMS), ang magiging bagong hepe ng Maritime Group.

Si C/Supt. Renato Angara, Director ng PNP Cagayan Valley ang magiging bagong ITMS Director.

Habang si S/Supt. Petronelli Baldebrin na nasa Office of the Chief PNP ang magiging bagong Director ng PNP Cagayan Valley. BOBBY TICZON

PATAY noon din ang isang lalaki matapos itong mabaril ng pulis na dapat sana’y pagnanakawan nitong motor sa Javier Legaspi Bridge, Brgy. Maybunga, Pasig City.

Sa ngayon ay wala pang pagkakakilanlan ang lalaki.

Ayon kay Sixto Balceta na isang baragnay tanod, hinoldap ng lalaki na may dalawa pang kasamahan si PO1 Lester Galong.

Nang malaman na pulis pala ang dapat sana’y bibiktimahin ay agad na tumakas ang dalawa, ngunit sinubukan pa ng suspek na labanan ang pulis gamit ang kanyang dalang balisong.

Nagkahabulan pa ang suspek at ang pulis hanggang sa Javier Legaspi Bridge kung saan nakorner ang suspek.

Dalawang tama ng bala ang tumapos sa buhay ng suspek, habang nagtamo naman ng sugat si Galong dahil sa pagsuntok sa kanya ng holdaper. JOHNNY ARASGA

DAKIP ang tatlong drug suspects sa isinagawang entrapment operation sa isang apartelle sa Quezon City.

Ayon kay C/Insp. Ferdie Mendoza, hepe ng District Drug Enforcement Unit ng Quezon City Police District (QCPD), isinagawa nila ang operasyon Lunes ng umaga na nagresulta sa pagkaka-aresto kina Edifir Banacia, Alfredo Ayong at Ana Marie Escoria.

Nakuha mula sa tatlo ang 20 gramo ng shabu na tinatayang nagkakahalaga ng P100,000.

Itinanggi naman ng tatlo na nagbebenta sila ng droga pero aminadong sila ay users.

Ani Mendoza, matagal na nilang minamanmanan ang tatlo na ang taktika ay magpalipat-lipat sa magkakaibang apartelle sa lungsod.

Lunes ng alas-4:00 ng umaga nang matunton ang tatlo sa apartelle sa New York St. kanto ng St. Mary St. sa Brgy. E. Rodriguez, Cubao.

Mayroon aniyang asset ang pulisya na matagal nang sumusubaybay sa tatlo at nang matiyak ang lokasyon ng mga ito ay agad ikinasa ang operasyon. JOHNNY ARASGA

DALAWA ang namatay habang 26 naman ang nasugatan nang mahulog sa malalim na bahagi ng kalsada ang isang pampasaherong bus sa bayang ito, nitong Sabado ng gabi sa Mindoro.

Namatay noon din ang mga biktimang nakilalang sina Elmer Decillo, 61, na sports director ng Rizal University System at si Jonathan Penada, 51.

Sugatan naman ang ilan sa mga estudynate na hindi nakuha ang mga pangalan at ngayo’y ginagamot na sa ospital

Sa ulat, naganap ang insidente dakong 6:30 p.m. sa Sitio Bunga, Brgy. Nicolas.

Bago ito, lulan ng bus ang 44 estudyanteng atleta at staff ng Rizal University System of Morong, Rizal at patungo sa Southern Tagalog Regional Association of State Universities and Colleges (STRASUC) Olympics na idadaos sa San Jose.

Pero ayon sa imbestigasyon ng pulisya, nawalan ng preno ang bus kaya nahulog ito sa malalim na bahagi ng Sitio Bunga, Brgy. Nicolas. BOBBY TICZON

DUMATING na sa bansa ang isang overseas Filipino worker (OFW) na ang mag-ina’y natagpuang patay sa kanilang bahay sa General Trias, Cavite nitong nakaraang Lunes.

Lulan ng Philippine Airlines flight PR-659 mula sa Dubai, dumating sa NAIA Terminal 2 si Marlon Gamos, isang seaman, na nanginginig at hindi mapigil ang paghihinagpis dahil sa sinapit ng kanyang asawa’t anak.

Nadiskubreng wala ng buhay ng kanilang mga kamag-anak na kapwa nakahiga sa kama ang mag-inang sina Ruby Gamos, 34, at anak na si Shania Nicole, 7.

Ayon kay Marlon, huli niya pang nakausap ang kanyang mag-ina nitong nakaraang Huwebes at matapos ang ang sumunod na mga araw ay hindi na sila nakitang lumabas pa ng kanilang bahay.

Iginiit nitong wala silang kaaway sa kanilang mga kapitbahay.

Base sa imbestigasyon ng pulisya, wala na ang ilang mamahaling gamit sa bahay ng biktima gaya ng telebision, tablets, cellphone, alahas, pati na ang kanilang kotseng Toyota Wigo na may conduction sticker na VD 9843.

Ayon kay General Trias P/Chief Supt. Jay Tafalla, posibleng nilooban ang bahay ng mag-ina saka pinatay nang manlaban.

Naniniwala rin si Tafalla na kilala ng mag-ina ang mga nasa likod ng krimen habang inaantay pa nila ang resulta ng autopsy para malaman ang sanhi ng pagkamatay ng mga ito.

Desidido ang padre de pamilya na makamit ang hustisya sa pagkamatay ng kanyang asawa at anak, at nanawagan na makipagtulungan sa pulisya ang sinomang nakakaalam ng impormasyon ukol sa krimen. BOBBY TICZON

SWAK sa kulungan ang isang 18-anyos na babae matapos mahulihan ng hinihinalang shabu sa isinagawang drug operation ng mga pulis sa Brgy. Pasong Tamo, Quezon City kagabi, Disyembre 11, Lunes.

Kinilala ni Supt. Danilo Mendoza, hepe ng Quezon City Police District station 3-Talipapa, ang suspek na si Rovelyn Sison, dalaga, tubong Negros Ococidental ng Purok 8, Unit 5, Brgy. Commonwealth, QC.

Ayon sa Talipapa police, nadakip ang suspek dakong 9:30 ng gabi sa Olibas St., NAWASA site, Brgy. Pasong Tamo.

Nabatid kay Mendoza na nagsagawa ng buy-bust operation ang mga tauhan ng QCPD station 3 Drug Enforcement Unit sa Nawasa Site, laban sa isang Khamar Salik na umano’y responsable sa pagpapakalat ng illegal na droga sa naturang lugar.

Habang isinasagawa ang operasyon, namataan ni PO1 Rogelio Reponte ang isang lalaki at babae na nakilalang si Rovelyn Sison na may dala umanong transparent plastic sachet na naglalaman ng hinihinalang shabu.

Agad dinakip ng mga pulis ang suspek subalit nakatakas ang lalaki habang nadakip naman si Sison.

Narekober kay Sison ang naturang illegal na droga at kasalukuyang nakapiit sa himpilan at nahaharap sa kaso. SANTI CELARIO

DALAWA ang patay kabilang ang isang 77-anyos na lolo habang apat naman ang nasugatan sa naganap na sunog sa Sampaloc, Maynila kaninang umaga.

Kinilala ang nasawing na si Anastacio Cruz, habang hindi naman makilala ang isa pa dahil natusta na ang buong katawan nito.

Nakilala naman ang mga sugatan na sina Ritchie Catle, 37, FO1 John Natividad na tumalon mula sa ikalawang palapag ng nasunog na bahay, Rosemarie Gonda at anak nitong si Mary Ann.

Sa report ng Manila Fire Department (MFD), dakong 10:20 ng umaga nang nagsimula ang sunog sa ikalawang palapag ng isang inuupahang bahay ng isang Boy Arthus sa 32B Maria San Francisco St., Sampaloc, Manila at mabilis na kumalat sa mga katabing bahay.

Sampung bahay naman ang tinupok ng apoy na umabot sa mahigit 30 mga pamilya ang nawalan ng tirahan.

Umabot sa ika-apat na alarma ang sunog na idineklarang fireout dakong 11:30 ng umaga.

Lumalabas naman sa inisyal na imbestigasyon na pinaglaruang posporo ng mga bata ang sinasabing sanhi ng sunog. JOCELYN TABANGCURA-DOMENDEN

TIMBOG ang isang tricycle driver matapos saksakin ang kanyang kabaro na nakaalitan nito kagabi sa Tondo, Maynila.

Nakilala ang suspek na si Christopher Saturnino, 41, taga-Tondo.

Nauna rito, kasama ng suspek ang biktimang si Ramsey Rojo at mga kaibigan na nagsusugal sa Juan Luna St., Tondo.

Napag-alamang habang nagsusugal ang dalawa ay nagkatinginan sila nang masama dahilan upang mag-away.

Nagbanta rin umano ang suspek sa biktima bago ito saksakin ng screwdriver.

Ayon naman sa suspek, ang biktima ang unang namukpok sa kanyang ulo kaya siya nagalit.

Anim na saksak ang ibinaon ng suspek sa katawan ng biktima habang malalaking bukol ang natamo ng suspek.

Mahaharap sa kasong frustrated homicide si Saturnino. JOCELYN TABANGCURA-DOMENDEN

PATAY ang tatlong empleyado ng isang printing shop nang makulong sa nasusunog na printing press kaninang madaling-araw sa Sampaloc, Maynila.

Kinilala ang mga nasawing sina Benjie Solis, 28, at Ronald Obiedo, 50, na halos hindi na makilala dahil sa tindi ng pinsalang tinamo sa sunog.

Habang isa pa ang inabutan pa ng mga bumbero na may pulso at itinakbo sa Jose Reyes Memorial Medical Center(JRMMC) na si Joel Eva, 50, ngunit binawian na rin ng buhay.

Sa report ni SFO3 Sony Laguna, imbestigador ng Manila Fire Deparment, dakong 4:30 ng madaling-araw nang nagsimula ang sunog sa Lumandas Printing Press sa kanto ng Recto Ave. at Morayta St. sa Maynila.

Nabatid na nagkaroon ng Christmas party ang mga empleyado ng nasabing printing press na nauwi sa inuman.

Aminado naman ang may-ari ng printing press na maging siya ay nakipag-inuman at nalasing hanggang sa nakatulog ngunit pasado 9:00 ng gabi nang siya’y mahimasmasan at magising kaya umalis na rin siya at umuwi malapit lamang sa lugar.

Hinihinalang ang naiwanang nakasaksak na videoke ang dahilan ng sunog kung saan ang isa sa mga biktima ay nakita sa banyo.

Dakong 5:10 ng umaga nang ideklarang fireout ang sunog na umabot lamang sa unang alarma at dito na nakita ang tatlong biktima.

Samantala, nilinaw ni Arson investigator Redentor Alumno na patuloy pa ang kanilang imbestigasyon kung may naganap na foul play sa pagkamatay at kung may kapabayaan sa panig ng may-ari matapos na nalaman na naka-padlock ang sliding gate kaya nahirapan ang mga bumbero na buksan ang nasabing opisina.

May naiwan din umanong mga tao sa kanyang shop na kinabibilangan ng tatlong biktima na noo’y nag-iinuman.

Tinatayang umabot sa P50,000 ang halaga ng napinsalang ari arian. JOCELYN TABANGCURA-DOMENDEN

TEPOK ang isang mag-lolo matapos pagbabarilin sa Brgy. Tangos, Navotas City.

Kinilala ang biktimang si Kenneth Maglunso, 15, at Fernando dela Cruz, 60.

Sa inisyal na imbestigasyon, away ng grupo ng mga kabataan ang tinitingnang motibo sa pamamaril na naganap bago mag-alas 11:00 ng gabi.

Nasangkot sa rambol si Kenneth kamakailan.

Bagaman napag-ayos na sa barangay ay nagbanta pa umano ang kaaway ni Kenneth na babalikan siya nito.

Kwento ni Jayjay dela Cruz, ama ni Kenneth, nagpaalam lang na bibili sa tindahan ang kanyang anak nang lumabas ito ng bahay.

Maya-maya pa ay nakarinig na sila ng mahigit limang putok ng baril.

Lumabas naman ng bahay si Fernando at umawat sa mga suspek pero sa halip na pakinggan ay dinamay din sa pamamaril ang lolo.

Patuloy ang imbestigasyon ng mga pulis sa krimen at hinahanap na rin ang isang alyas JR na suspek. JOHNNY ARASGA

TATLO ang nalagas habang isa naman ang nasugatan nang sumalpok ang kanilang sinasakyang kotse sa isang umaatras na trak sa Ilocos Sur, kaninang Sabado ng madaling-araw.

Dead-on-arrival sanhi ng pinsala sa katawan ang nagmamaneho ng kotse na si Antonio Pamo, mga sakay nitong sina Jaymar Pamo at Rudolph Valentino Sistoza na pawang mga taga-Arnap, San Ildefonso.

Nasa intensive care unit (ICU) naman ng isang ospital ang isa pang sakay ng kotse na si Wilson Domenden na nagtamo rin ng pinsala sa katawan.

Nasa kustodiya na ng pulisya at nahaharap sa patong-patong na kaso ang drayber ng Isuzu trak na nakilalang si Marlon Brando Nieto, ng Guerrero, Dingras, Ilocos Norte.

Sa ulat, naganap ang insidente dakong 3 a.m. sa national highway ng Brgy. Guimod, Bantay, Ilocos Sur.

Ayon sa Bantay municipal police station, bago ang aksidente ay umaatras ang trak ni Nieto sa nasabing highway nang biglang sumalpok ang Nissan Sentra na minamenho ni Pamo sa ilalim ng chasis ng trak.

Rumesponde naman agad ang mga tauhan ng Provincial Risk Reduction and Management Office (PDRRMO) para alisin ang mga naipit na biktima sa loob ng kotse.

Ito na ang ikalawang malagim na aksidente na nangyari sa Ilocos Sur na noong November 30 ay apat ang namatay nang sumalpok ang kotse sa isang armored car sa bayan ng Narvacan. BOBBY TICZON

TATLONG pulis ang namatay habang tatlo naman ang nasugtaan nang sinuwag ng kanilang patrol car ang isang 10-wheeler truck sa bayan ng Iguig, Cagayan nitong Biyernes ng gabi.

Namatay habang nilalapatan ng lunas sa ospital ang mga namatay na nakilalang sina PO1 Benjie Kate Pursen, driver, PO1 Basiad at PO1 Galario na pawang mga taga-lalawigan ng Apayao.

Sugatan naman ang iba pang pulis na nakilalang sina PO1 Charlo Kiat-ong, PO1 Junrie Balong-angay at PO1 Venie Balangue.

Hindi naman nabanggit sa ulat, kung nahuli ang drayber ng trak o nakatakas at ngayon at tinutugis na.

Sa pagsisiyasat ni PO2 Anthony Pamittan ng PNP Iguig na pabalik na ng presinto ang mga pulis nang mag-overtake ang kanilang patrol car sa isang kotse na nasa kanilang harapan.

Hindi marahil nakita ni Pursen ang naturang trak na patungong Tuguegarao kaya huli na bago pa niya maiiwas ang kanilang patrol car.

Nabatid na nanggaling ang mga pulis sa Tuguegarao matapos ipa- CT scan sa isang opsital ang isa nilang kasamahang pulis. BOBBY TICZON

SUGATAN ang isang tricycle driver nang saksakin ng kabaro nito dahil sa agawan ng pasahero sa Tondo, Manila.

Inoobserbahan sa Jose Reyes Memorial Medical Center ang biktimang si Gilberto Canoza, 40, ng no. 2108 Molave St., Tondo bunsod ng tinamong saksak sa kaliwang tagiliran.

Nakapiit na sa Manila Police District-Station 7 ang suspek na si Edmund Sablaon, 36, ng no. 1027 Tayabas St., Tondo.

Sa ulat, alas-4:45 ng madaling-araw nitong Sabado naganap ang gulo sa pilahan ng tricycle sa Molave St. Nabatid na may pasahero umano na sa biktima sumakay imbes na sa suspek dahil may pila.

Sinita ng suspek ang biktima na nauwi sa pagtatalo at suntukan hanggang bumunot ng patalim ang suspek at sinaksak si Canoza sa kaliwang bahagi ng katawan.

Sugatan din ang suspek dahil sa tinamong panununtok ng biktima sa kanyang ulo.

Naaresto ang suspek habang isinugod sa pagamutan ang biktima. JOCELYN TABANGCURA-DOMENDEN

PATULOY na nalalagas ang mga kurakot na opisyal at miyembro ng Philippine National Police (PNP).

Sa katunayan, ipinag-utos ni Pangulong Rodrigo Roa Duterte na alisin ang tatlong pulis na may ranggong Superintendent dahil sa pagiging kurakot at tanggalin ang may 60 – 90 tiwaling pulis.

Sa naging talumpati ni Pangulong Duterte sa ika-39 kaarawan ni Sen. Manny Pacquiao sa General Santos City, hindi naman nito binanggit ang pagkakakilanlan ng mga pulis na nais niyang sibakin sa puwesto.

Inamin ng Pangulo na nakadidismaya dahil nakapasok sa PNP ang mga kurakot at mga gangster.

Kaya nga, panahon na upang umpisahan na niya ang paglilinis sa hanay ng police Institution at talagang hihiritan niya aniya ang mga ito.

“I’m just warning itong mga pulis na kurakot o ‘yung mga may — it could be the mayor’s office or it could be — talagang hihiritan ko kayo, babantayan ko kayo,” pahayag ni Pangulong Duterte.

Bihasa at tila normal na sa mga ito ang nasabing kalokohan katulad ng panghoholdap at iba pang mga iligal gaya ng droga na aniya’y hindi niya hahayaan at talagang aalisin sa serbisyo. KRIS JOSE

TIGOK ang isang pulis habang isa pa niyang kasamahan ang nasugatan dahil sa pakikipaghabulan sa mga drug suspect na kanilang tinutugis sa Caniogan, Pasig City.

Kinumpirma ni National Capital Region Police Office (NCRPO) Chief Dir. Oscar Albayalde na nasawi si PO3 Wilfredo Gueta matapos tamaan nang dalawang beses sa dibdib.

Kinilala naman ang sugatan niyang kasamahan na si PO1 Raymond dela Cruz, habang kumpirmadong patay din ang suspek na si Roberto Lianugo dahil sa mga natamong tama ng bala sa katawan.

Nagtungo nitong Lunes ng tanghali ang mga pulis ng Pasig City sa Katarungan St. upang beripikahin ang mga pagkakakilanlan ng mga hinihinalang gumagamit at nagbebenta ng iligal na droga sa nasabing lugar.

Gayunman, tinakbuhan ni Liaguno si Gueta at iba pang mga pulis na hinabol siya hanggang sa nakarating ang suspek sa kanyang bahay.

Nang pasukin ito, doon na nagsimulang paputukan ni Liaguno ang mga pulis na humabol sa kanya partikular si Gueta na nasa likod lang niya.

Nagawa namang makipagpalitan ng putok ni Dela Cruz kay Liaguno at sa isa pang suspek, dahilan para magtamo ng mga tama ng bala sa katawan si Liaguno.

Naisugod pa sa Rizal Medical Center sina Gueta at Dela Cruz, ngunit hindi na kinaya ni Gueta at idineklara siyang patay pasado alas-2:00 ng hapon. Idineklara namang dead-on-arrival si Liaguno.

Dalawang sachet ng hinihinalang shabu at mga drug paraphernalia ang nasabat ng mga pulis sa crime scene. JOHNNY ARASGA

MASANGSANG na ang amoy ng isang 50-anyos na lalaki na sinasabing may “diperensiya” sa pag-iisip nang matagpuang nagbigti sa loob ng inuupahang kuwarto sa Sta. Cruz, Maynila.

Hinihinalang may ilang araw ng patay ang biktimang si Filomeno Almendralejo, Jr., alyas Jun, boarder sa 1206 M. Natividad St., Sta. Cruz, Maynila.

Alas-8:00 ng gabi nang matagpuan ang biktima na nakabigti gamit ang isang kulay asul na nylon cord.

Ayon kay Jocelyn Santos, landlady ng biktima, mag-iisang taon na umanong nangungupahan sa kanya ang biktima matapos itong i-deport mula sa United States sa hindi malamang kadahilanan at tumatanggap ng buwanang allowance sa kanyang ina na nakabase na sa US.

Nalaman din na ang biktima ay na-diagnose na may mental health disorder at regular na umiinom ng alak.

Huli umanong nakitang buhay ang biktima dakong 2:00 ng madaling-araw na naglalakad sa loob ng kanilang bahay ng isang boarder na si Renato Santos.

Dakong 8:00 ng gabi nang makaamoy ng masansang ang kanyang kasamang boarder na si Lourdes Lim mula sa kuwarto ng biktima kaya kaagad nitong sinabi kay Santos.

Kinatok umano ni Santos ang kuwarto ng biktima na noo’y bahagyang nakabukas ngunit patay ang ilaw kaya gumamit ito ng flashlight at nakitang nakatayo ito.

Gayunman, hindi na nilapitan ni Santos ang biktima dahil sa katayuan nito kaya nagtungo na lamang sa barangay para humingi ng tulong at pagdating ni Kagawad Romualdo Sta. Maria ay nakita nila na nakabigti ang biktima. JOCELYN TABANGCURA-DOMENDEN