ARESTADO ng mga pulis ang pitong hinihinalang drug user kabilang ang 49-anyos na ginang habang naglalaro ng “cara y cruz” na sinasabing shabu ang taya miyerkules ng gabi April 18 sa Malabon City,

Kinilala ni Malabon police head of Station Drug Enforcement Team ang mga naarestong suspek na sina Michael Ramirez, 33, Romulo Villaester, 28, Renan Oriendo, 38, Marvi Barredo, 30, Jayde Gonzales, 31, Jocelyn Viscante, at Nestor Acosta, 58, pawang mga residente ng Brgy., Potrero.

Sa imbestigasyon ni PO2 Aires Manansala, dakong alas-8:45 ng gabi, nagsasagawa ng anti-criminality campaigned ang mga tauhan ng PCP-2 sa kahabaan ng Mangustan Toad, Brgy. Potrero nang may lumapit na concerned citizen at inireport ang umano’y mga naglalaro ng cara y cruz sa naturang lugar.

Agad pinuntahan ng mga pulis ang naturang lugar at naabutan ang mga suspek na naglalaro ng cara y cruz na naging dahilan upang arestuhin ang mga ito.

Ayon kay PCI Romulo Mabborang, narekober sa naturang lugar ang tatlong peso coin (pangara) at P270 taya habang nang kapkapan ang mga suspek ay nakuhanan ang mga ito ng pitong plastic sachet na naglalaman ng hindi pa matukoy na dami ng hinihinalang shabu. ROGER PANIZAL

NAPUTOL ang kaliwang braso at hita ng isang sekyu nang tumalon mula sa ika-19 na palapag at bumagsak sa konkretong bubungan ng ikalawang palapag ng gusali ng Bangko Sentral ng Pilipinas (BSP) sa Malate, Manila kahapon.

Kinilala ni Manila Police District (MPD) Director Chief Supt. Joel Napoleon Coronel ang biktima na si John Cyrus Migallos Mamburam, 31, security guard ng BSP, at residente ng Forest View Village, Davao City.

Sa report ng Manila Police District (MPD)-Station 9, dakong 5:18 kahapon nang maganap ang insidente sa 19th Floor ng Multi-Purpose ng BSP building na matatagpuan sa A. Mabini Street, kanto ng P.Ocampo Street sa Malate.

Sa ibinigay na salaysay sa pulisya ni  William Pararuan, 46, bigla siyang nakarinig ng malakas na kalabog na tumama sa konkretong sahig, kaya’t kaagad aniya itong
ipinagbigay-alam sa duty guard ng gusali.

Kanya itong tinignan kung saan nadiskubre ang katawan ng biktima na nagkalasog lasog ang laman sa sahig at sa kalsada patungong Gate 5 ng gusali.

Kaagad namang ipinagbigay-alam sa pulisya ni Jose Cipriano Kalaw, 35, incident management team ng BSP, ang pangyayari upang maimbestigahan.

Sa imbestigasyon naman ni homicide investigator SPO1 Jeffrey Laus, kay Fernando Nicolas, deputy director for security ng BSP, sinabi nito na nasa ilalim ng kanyang superbisyon ang  biktima.

Nalaman din na ang biktima ay may problema sa kanyang nobya na isa ngayon sa iniimbestigahan ng pulisya.. JOCELYN TABANGCURA-DOMENDEN

NAHULOG sa bangin ang isang van sa Bokod, Benguet na ikinasawi ng apat katao.

Papunta sana ang van sa Quirino province kung saan dadalo sa kasalan at reunion ang magkakamag-anak

Ayon sa kamag-anak ng isa sa mga sugatang pasahero, nawalan ng kontrol sa van ang driver nang pumalya ang brake nito.

Sakay ng van ang 12 katao nang maganap ang insidente kagabi. Narinig ng mga motorista sa lugar na may nagpapasaklolo kaya inalerto nila ang rescuers.

Dead on the spot sina Antonio Bulay, Alipio Bulay at Julie Valencia.

Naisugod pa sa ospital si Gemma Lorenzo ngunit patay na nang dumating ito roon.

Patuloy namang binabantayan ng mga doktor ang kondisyon nina Corazon Bulat at Nelly Joy Soriano. Ginagamot din ang driver at iba pa na nagtamo ng minor injuries.

Patuloy naman ang imbestigasyon ng mga otoridad sa insidente. JOHNNY ARASGA

PATAY makaraang umano’y manlaban sa buy-bust operation ang itinuturing na number one sa drugs watchlist sa Malolos City, Bulacan.

Kinilala ang suspek na si Antonio Yamson, 59-anyos na nakuhanan ng isang kalibre .38 na baril at 45 plastic sachet ng hinihinalang shabu at marijuana.

Ayon kay Supt. Heryl Bruno, hepe ng Malolos City police, nanlaban umano si Yamson sa ikinasang buy-bust operation ng mga pulis makaraang matunugan na pulis ang kaniyang katransaksiyon.

Sinabi ni Bruno na itinuturing na “Kingpin” si Yamson sa palengke sa Malolos City at protektor din ng drug personalities sa lugar.

Maliban sa pagkakasangkot sa illegal na droga, may mga kaso rin ang suspek na robbery-holdup, murder at homicide. JOHNNY ARASGA

PINAYUHAN ni Regional Director Eduardo Janairo, ng Department of Health (DOH) – CALABARZON (Cavite, Laguna, Batangas, Rizal, Quezon) ang publiko at mga local government units (LGUs) na mag-ingat laban sa ilang indibidwal na rumaraket at nagsasamantala sa Dengvaxia issue upang kumita ng pera.

Sa isang sulat, sinabi ni Janairo na nakarating sa kanyang tanggapan ang ulat na may grupo na nagpapakilalang mga “good samaritan” at humihingi ng tulong pinansiyal at dengue kits para ibigay sa mga estudyante ng Malakaban, Binagonan, Rizal na umano’y nabakunahan ng Dengvaxia vaccine.

Sinabi ni Janairo na wala silang naitalang kaso ng mga bata sa Rizal na dumaranas ng kumplikasyon matapos na mabakunahan ng Dengvaxia.

Iginiit rin niya na hindi dapat sinusuportahan ng publiko at LGUs ang mga ganitong raket.

“We wish to inform the public that there are no such children suffering from any complication against Dengvaxia in the area. Such unscrupulous demands will not be entertained, allowed, tolerated nor given support of any kind,” ani Janairo.

Hinikayat pa ng health official ang publiko na kaagad na ipaalam sa DOH-Task Force sa telepono (02) 711-1001 to 02; Smart (0920) 110-7498; Globe (0917) 0915- 7725621, kung may nalalaman silang indibiduwal na ginagawang raket ang Dengvaxia issue para kaagad na maaksyunan at mapanagot ang mga ito.

Tiniyak rin ni Janairo na direkta na silang nakikipag-ugnayan sa mga magulang ng mga bata na umano’y nagkaroon ng sakit makaraang maturukan ng Dengvaxia upang mapagkalooban ng kaukulang tulong ang mga ito. MACS BORJA

ISANG dating preso sa New Bilibid Prison (NBP) kasama ang 4 na iba pa na pawang sangkot sa illegal drugs ang inaresto ng operation ng Task Force Anti-Illegal Drugs ng National Bureau of Investigation (NBI-TFAID) sa Hagonoy, Bulacan.

Iniharap sa media ang mga suspek na sina Antonio Lascano DelaCruz Sr., Antonio Lascano DelaCruz, Jr., Gilbert Montemayor Bondoc, Ralph Cruz Paule at Jeric Mariano Lascano.

Sa imbestigasyon ng NBI, isinisilbi ang search warrant laban kay Lascano Dela Cruz, Sr. kahapon sa kanyang tahanan sa Hagonoy, Bulacan kung saan isinasagawa ang illegal drugs trade ng suspek.

Ayon sa NBI, dati nang nakulobg sa NBP si Lascano Dela Cruz Sr lider ng Sigue Sigue Sputnik Gang at pinalaya noong 2011 matapos na mapagsilbihan ang 10 taong parusa dahil sa kasong frustrated homicide.

Sangkot sa illegal drugs mula 1980 si Lascano Dela Cruz Sr., at gamit bilang front ng shabu trade ang 5-ektaryang fishpond sa Taytayin, Hagonoy.

Bukod dito, kilala rin umano si Lascano Dela Cruz Sr bilang AFP Colonel dahil palaging nakasuot ng uniform ng militar at de-baril. Nakumpiska sa kanyang pag-iingat ang P400,000 halaga ng shabu, 13 firearms kasama na rito ang 12 gauge shotgun, browning cal. 9mm, at bersa mini thunder cal.40 at mga bala,

Nadakip naman ang apat pang suspek dahil sila ay naaktuhan sa paggamit ng bawal na droga.

Tinangka pa umano ng mga suspek na tumakas ngunit sila ay nahuli rin ng mga operatiba ng ahensya.

Isinalang na sa inquest proceedings sa mga kasong paglabag sa Republic Act 9165 o Comprehensive Dangerous Drugs Act of 2002 at RA 10591 o Comprehensive Law on Firearms and Ammunition. JOCELYN TABANGCURA-DOMENDEN

BINITBIT ng mga tauhan ng Manila Police District (MPD) na nagpapatupad ng kaayusan sa mga pila ng mga naghahain ng kanilang Certificate of Candidacy sa tanggapan ng Commission on Elections (Comelec) sa Arroceros sa Ermita, Maynila ang isang lalaki na umano’y nakainom ng alak.

Ito ay matapos muntikan na umanong masagasaan ni Alexander Chiang Arcenal, 46-anyos, residente ng Quezon City ang hilera ng mga nakapila.

Minamaneho umano ni Arcenal ang kulay puting Subaru na SUV na may plakang ALA 4602 nang mangyari ang insidente pasado alas-7 kaninang umaga.

Sa imbestigasyon ni SPO4 Ronald Magpantay, nagtuloy-tuloy ang sasakyan ng suspek sa hanay ng mga nakapila sa Comelec.

Sinita ng mga pulis na naroon sa lugar ang suspek at nang buksan ang bintana ng sasakyan ay nangamoy alak.

Inihahanda pa ang kasong maaring isampa laban sa suspek. JOCELYN TABANGCURA-DOMENDEN

TIMBOG ang isang mag-asawa at dalawa pa nilang kasabwat sa pagnanakaw ng motorsiklo sa Tondo, Maynila.

Nakakulong ngayon sa MPD-Station 7 ang mga suspek na sina Ronald Encarnado, Vanessa de Mesa, Jason Laquindanum at Alexander Banzuelo.

Naaresto ang apat sa tulong na rin ng kuha ng CCTV habang ninanakaw ang motorsiklo sa kahabaan ng Antipolo Street sa Tondo.

Nabatid na pitong motorsiklo na rin ang natatangay ng mga suspek mula pa noong Nobyembre 2017.

Nagsisilbing look out si De Mesa kapag may target na nanakawing motorsiklo gamit ang isang masterkey.

Modus umano ng mga suspek na ibenta sa murang halaga ang mga nakaw na motorsiklo .

Nakuha naman sa pag-iingat ng mga suspek ang isang kalibre .45 at patalim.

Kasong paglabag sa New Anti-Carnapping Act at karagdagan pang reklamo dahil sa nakuhang patalim at baril laban sa mga suspek. JOCELYN TABANGCURA-DOMENDEN

SA comfort room ng isang gusali na natagpuang walang buhay ang isang helper sa Sampaloc, Maynila.

Sa natalang ulat ng Manila Police District-Homicide Section, nakilala ang biktima na si  Rodrigo Bagat Jr., alyas “JR”, 19, helper, residente ng Room 204, Corazon Tibayan Building, no. 774 Montaña Street, Earnshow, Sampaloc, Maynila.

Sa ulat ng imbestigador na si PO3 Roderick Magpale dakong alas-3:30 Biyernes ng hapon nang madiskubre ang insidente ng isang tindera ng sari-sari store na gagamit umano ng CR na si Emily Ayon.

Sa salaysay ni Ayon sa pulisya, gagamit umano sana ito ng CR nang madiskubre ang biktima na nakalambitin sa kisame gamit ang nylon cord na itinali sa kahoy.

Agad namang ipinaalam ni Ayon ang insidente sa barangay official na siya namang nagreport sa pulisya.

Aalamin pa sa kapatid na si Roy Bagat at live-in partner nito si Amira Domrique kung ano ang posibleng dahilan ng pagbigti ng biktima. JOCELYN TABANGCURA-DOMENDEN

INABUTAN nang panganganak si Elsa Pansa sa loob ng Mobile ng Pulis ng Manila Police District matapos tanggihan ng taxi na sana ay mag papahatid sa Fabella Hospital.

Ayon sa dalawang pulis na umasiste sa buntis na sina P01 Rafael Robles at P02 Melchizedek Bangayan, pawang mga nakatalaga sa MPD Station 3, nakita nila si Elsa sa harapan ng Telecom Comp., Sta Cruz, Manila alas-7 ng umaga na nag-aabang ng taxi ngunit ito ay tinatangihan isakay.

Habang nagpapatrolya sa  lugar ang dalawa sakay ng police mobile napansin ni P02 Banganyan na dinudugo na ang buntis at tila nahihirapan kung kaya’t daglian nila itong isinakay sa kanilang Police Mobile upang dalhin sa Dr. Jose Fabella Hospital. Habang tinatahak ang daan papunta sa ospital biglang pumutok ang panubigan ni Pansa at inabot na ng panganganak sa loob ng sasakyan.

Ligtas na nakarating ang ina at bagong panganak na sanggol na lalaki sa ospital at agad inasikaso ng doktor na ngangalaga sa kalusugan ni Pansata upang tiyakin na nasa maayos na kalagayan ang dalawa,

Taos sa puso naman ang pasasalamat ni Pansa sa mga kapulisan na nag magandang loob sa kanya.

Agad pinapurihan ni P/Supt.Arnold Thomas Ibay, Commander ng MPD Station 3, ang kanyang mga kapulisan dahil sa ginawa nilang pag-tulong sa ginang na nanganak sa kanilang police mobile. STORY AND PHOTO BY: CRISMON HERAMIS.

ARESTADO ang isang Chinese national matapos makuhanan ng tatlong kilo ng hinihinalang shabu na aabot sa P15-milyon sa buy-bust operation kagabi sa Maynila.

Pinangunahan ng Philippine Drug Enforcement Agency (PDEA) ang nasabing operasyon na ikinaaresto ng suspek na nakilalang si Qingchu Xu, 37, ng Fujian, China.

Limang taon nang nakatira ang suspek sa Pilipinas at galing ito ng Fujian, China.

Sa ulat, nakuha ang isang kilo sa pag-iingat ni Xu habang nakuha sa kanyang sasakyan ang dalawang kilo pa na hinihinalang idedeliber na sa mga kostumer.

Bukod dito, kinumpiska rin ang kanyang sasakyan na umano’y ginagamit sa pagdedeliber ng droga.

Nabatid na dalawang buwan nang isinailalim sa surveillance ang suspek bago ito nasakote sa service road ng Pasaje del Carmen at Roxas Blvd. sa Maynila.

Iniimbestigahan na ang suspek at inaalam kung konektado ito sa Dragon Wu drug syndicate na nasa likod ng mga shabu laboratory at warehouse na nadiskubre sa Malabon, Batangas at Marikina.

“Iniimbestigahan pa natin. Wholesaler ito. I believe my botikang pinagkukunan ito,” pahayag ni Fajardo.

Nahaharap sa kasong paglabag sa Comprehensive Dangerous Drugs Act ang suspek. JOCELYN TABANGCURA-DOMENDEN

HABANG papalapit ang barangay election, nilinaw ng Department of the Interior and Local Government (DILG) na nasa kamay ng PDEA ang responsabilidad para ilabas ang listahan ng mga barangay captain at kagawad na sangkot umano sa kalakalan ng illegal drugs sa bansa.

Reaksyon ito ng DILG hinggil sa panawagan ng publiko na dapat ilabas ang listahan ng mga brgy. captain at kagawad na sangkot sa illegal drugs.

Ayon kay Asec. Jonathan Malaya Spokesperson ng DILG ang Philippine Drug Enforcement Agency (PDEA) ang dapat na maglabas ng listahan ng mga barangay official na hinihinalang sangkot sa illegal drugs.

Nauna rito magugunitang kinumpirma ni PDEA Director General Aaron N. Aquino na aabot sa 287 barangay captain at kawagad ang hinihinalang sangkot sa kalakalan ng illegal drugs sa bansa.

Sa press conference kaninang umaga Abril 23, 2018 (Lunes) sa tanggapan ng DILG sinabi ni Asec. Malaya na dapat ang PDEA ang maglabas ng drug list ng mga barangay official na pinaghihinalaang sangkot sa illegal drugs.

“Dapat ang PDEA ang maglabas ng drug list ng mga barangay official (brgy.Captain at kagawad na sangkot sa illegal drugs) dahil sila ang right agency”ani pa ni Malaya.

Sinabi pa ni Malaya may impormasyon siya na maglalabas ang PDEA ng listahan ng mga barangay official na sangkot sa kalakalan ng illegal drugs subalit hindi nito dinetalye ang naturang isyu.

Nabatid pa kay Malaya na mahigpit na ipinagbabawal ng batas na gamitin ng mga tumatakbong kandidato ng barangay ang mga resources at pasilidad ng barangay hall dahil labag ito sa batas. SANTI CELARIO

INIIMBESTIGAHAN ngayon ng Manila Police District (MPD) ang motibo sa pagpatay sa isang 42-anyos na electrician na binaril sa ulo habang naglalakad sa Tondo, Maynila kagabi.

Kinilala ang biktima na si Ferdinand Estrella, walang asawa, residente ng 1042 New Antipolo St., Tondo, Maynila.

Inaalam nama ang pagkakilanlan ng dalawang hindi nakilalang suspek na responsable sa pagpatay sa biktima.

Sa imbestigasyon ni MPD-Homicide Section investigator SPO3 Chares John Duran, ganap na alas-11:35 ng gabi nang mangyari ang insidente sa harap ng barangay hall ng Barangay 218 na matatagpuan sa kahabaan ng New Antripolo Street sa Tondo.

Nauna rito, nagpaalam umano ang biktima sa kanyang kapatid na si Cristina Estrella na huwag i-lock ang pinto ng kanilang bahay dahil bibili lamang ito ng Tapsilog.

Habang naglalakad ang biktima sa kahabaan ng Antipolo Street nang biglang nilapitan ng lalaking nakasuot ng ball cup at walang sabi-sabing binaril sa kaliwang tenga.

Nang maisakatuparan ang pakay ay saka sumakay sa isang kulay itim na sasakyan saka mabilis tumakas.

Inaalam na ng pulisya kong may CCTV sa lugar na maaring makapagtukoy sa pagkakailanlan ng mga suspek.

Narekober sa crime scene ang basyo ng .45 kalibre ng baril na ginamit sa pamamaril sa biktima.

Patuloy ang imbestigasyon ng pulisya sa pangyayari. JOCELYN TABANGCURA-DOMENDEN

PATAY ang 53-anyos na construction worker matapos pagtulongang saksakin at bugbogin ng tatlong lalaki sa Tondo, Maynila kagabi.

Namatay habang nilalapatan ng lunas sa Gat Andres Bonifacio Hospital ang biktima na nakilalang si Noel Mandahuyan, may-asawa, residente ng Building 29 Unit 37, Aroma Compound, Tondo,Maynila.

Naaresto nama ang isa sa tatlong suspek na si Raul Navarro, nasa hustong gulang at residente rin ng nasabing unit habang pinaghahanap pa ng pulisya ang dalawa pang suspek na sina Jeffrey Duran alyas Anding, nasa hustong gulang at Megn Duran, kapwa nakatira sa nasabing lugar.

Sa ulat ni PO2 Jonathan Ruiz, imbestigador ng Manila Police District-Homicide section, dakong alas-6:30 kagabi nang maganap ang insidente sa ikalawang palapag ng Building 29.

Sa salaysay ng testigong sina Rosemarie at Josephine Olitan, sa di mabatid na kadahilanan ay dinamba umano ang biktima ng tatlong suspek na noo’y armado ng patalim.

Habang pinatutulongang saksakin ng mag-anak na Duran ang biktima ay sinusuntok at sinasampal naman ito sa mukha ni Navarro.

Tinangka pa umanong makatakas ng biktima sa mga suspek subalit patuloy siyang inundayan ng saksak sa katawan.

Matapos ang pananaksak ay saka tumakas ang mga suspek subalit nahuli si Navarro sa isang follow up operation ng MPD-Station 1.

Sasampahan ng kasong murder si Navarro na nakatakdang iharap sa Manila prosecutors Office para sa Inquest proceedings gayundin kaparehong kaso din ang isasampa laban sa mag-anak na Duran. JOCELYN TABANGCURA-DOMENDEN

GALIT na galit si Department of Education (DepEd) Secretary Leonor Briones at pinamamadali ang pagsasampa ng kaso kontra sa guro mula sa Cebu na diumano’y nangmolestiya ng isang atleta sa 2018 Palarong Pambansa sa Ilocos Sur.

Ayon kay Deped Undersecretary Tonisto Umali, iniutos umano ni Sec. Briones ang pagsampa ng kasong administratibo at kriminal laban kay Rodymar Lelis, 28-anyos.

Isiniwalat ni Umali na matibay ang ebidensya laban sa naturang guro ngunit dadaan pa rin ito sa due process.

Gawing mabilis aniya ang imbestigasyon at kung mapatunayan mang nagkasala si Lelis, haharap ito sa parusa.

Kung maaalala, inireklamo ng act of lasciviousness ng 14-anyos na atleta ang guro na umano’y nagtangkang manghalik sa kanya sa loob ng CR sa venue ng sporting event.

Nagtanong pa raw ito kung magkano ang kanyang presyo.

SUGATAN ang isang fire volunteer nang tupukin ng apoy ang anim na pinto ng apartment unit sa Sta. Mesa, Maynila ngayong umaga.

Nakilala ang sugatan na si Cedric Gamboa, ire volunteer mula sa Sta. Ana, Maynila .

Nagsimula ang sunog ganap na alas 8:45 ng umaga na umabot sa unang alarma at naideklarang fire out alas-10:13 ng umaga.

Sinasabing nag-overheat na electric fan ang dahilan ng sunog sa helera ng mga apartment sa Barangay 607, Bagumbayan Extension, Bacood, Sta. Mesa Maynila.

Inaalam pa ang kabuuang halaga ng pinsala ng natupok ng apoy. JOCELYN TABANGCURA-DOMENDEN

TIKLO ang magbilas na umanoy tulak ng droga matapos ang kinasang buy-bust operation ng Philippine Drug Enforcement Agency Special Enforcement Agency sa lungsod ng Manila.

Kinilala ni PDEA director general ang suspek na si Abdul Gaffar 28, vendor, may asawa, ng Cacarong Mantanda, Pandi, Bulacan. Habang sinugod sa East Avenue Medical Center ang bilas nito makaraan mabaril sa kanang binte na kinilala si Jalanie , makaraan agawin ang bag na may baril ng isa sa mga operatiba.

Batay sa report ni PDEA Regional Director Levi Ortiz, naaresto ang mga suspek sa bahagi ng Katikbak at Roxas Blvd., ala-una kahapon sa ikinasang drug buy bust operation. Nakumpiska  sa kanila ang 500 grams na high grade shabu na may street value na 2.5 million pisong halaga, isang unit ng Toyota Innova na may plate no. ZGR 338.

Ayon sa team leader na si Agent Jonar Cuayzon, umabot sa isang buwan ang isinagawa nilang surveillance bago naikasa ang operation na nagresulta sa pagkakaaresto sa dalawang suspek.

Samantala ayon sa isa sa mga suspek na si Gaffar, ay isinama lang daw siya ng kanyang bilas at hindi niya alam na droga ang kanilang dala. Hindi naman kinagat ni director Ortiz ang katwiran ng suspek na siya ay walang kinalaman sa pagtutulak ng droga. Nahaharap ang dalawa ng paglabag sa Republic Act 9165 or Comprehensive Dangerous Drug act of 2001. PHOTO AND STORY BY: CRISMON HERAMIS

HINDI nakalusot sa inilatag na Oplan Sita ng Manila Police District (MPD) ang isang 42-anyos na biker matapos mahulihan ng hindi lisensyadong baril sa kabila ng mahigpit na kautusan kaugnay sa Election gun ban sa bansa.

Ayon kay PO1 Danilo P. Kabigting, kinilala ang naaresto na si Glenn Dea Rosario Dario residente ng Area 3, Capiligan st ., E. Rodriguez Avenue, Quezon City.

Si Dario ay isinailalim a sa Inquest Proceedings sa Manila Prosecutors Office kaugnay sa umiiral na Republic Act 10591 (Illegal Possession of Firearm and ammunition) na may kaugnayan sa Batas Pambansa 881 Sec. 261 (q) [Carrying of Firearms outside residence or Place of Business] ng Omnibus Election Code, Comelec Resolution 10015 (Gun Ban.)

Naaresto umano ito habang nagsasagawa ng Oplan Sita ang mga tauhan ng Lacson Police Community Precint sakop nh MPD-Station 4 sa kahabaan ng Legarda St., Sampaloc, Maynila kahapon.

Malayo pa man si Dario sa mga nakaposteng pulis ay kapansin pansin na ang tila bakal na nakasukbit sa kanyang betwang habang nakataas ang kanyang t-shirt.

Agad siyang nilapitan ng mga pulis at pinigil at kinapkapan bukod sa pagkumpiska sa baril.

Nabatid na isang kalibre 38 ang baril na kargado ng 2 bala kaya siya binitbit sa Station Investigation and Detective Management Branch ng MPD-Station 4.

Walang naipakitang dokumento o lisensiya ang suspek kaugnay sa pagbibitbit ng baril.

Nabatid na miyembro ng Bahala na Gang ang suspek at makailang beses na umanong nasangkot sa mga kaso ng robbery sa Maynila at Quezon City.

Paliwanag pa umano ng suspek, patungo siya sa isang kaibigan upang dalhin ang baril.

Upang maberipika kung sangkot ang baril sa anumang krimen ay ipinasuri ito sa MPD Crime Laboratory Office para sa Ballistic.

May impormasyon din na modus na ngayon ng Gun for Hire Syndicate na gumamit ng bisikleta sa pagdadala ng baril dahil mas madalas masita ang mga scooter at motorsiklo. JOCELYN TABANGCURA-DOMENDEN

LABING APAT na katao ang inaresto ng mga tauhan ng Manila Police District sa isinagawang pagsalakay sa magkahiwalay na drug den sa Paco at Tondo, Maynila.

Target sa operasyon ng drug enforcement team si Gerald Mark Lara alyas Jay-Jay na naaresto sa isang bahay sa Pedro Gil St., sa Paco.

Si Lara ay itininuturong notoryus na nagbebenta ng droga sa kanilang lugar.

Arestado rin ang dalawa niyang tiyuhin matapos mahulihan ng .38 kalibre ng baril na kargado ng bala at replica ng baril.

Bukod dito, may nakuha ding sachet ng shabu na may street value na P60,000 sa kanilang bahay.

Napag-alaman din na may pending warrant of arrest si Lara sa kasong kidnapping at dati na nakulong sa kasong robbery ayon na rin sa isinagawang background check ng pulisya.

Itinanggi naman niyang sangkot siya sa droga maging ang dalawa nitong tyuhin ay itinangging may nakuhang baril at shabu sa loob ng kanilang bahay.

Samantala, 11 iba pa ang naaresto ng naman sa Tondo, Maynila sakop ng MPD-Station 1 matapos maaktuhang gumagamit ng droga sa isang barung-barong na dalawang taon na umanong ginagawan drug den .

Sasamapahan ng kaukulang kaso ang mga naarestong suspek. JOCELYN TABANGCURA-DOMENDEN

PATAY ang isang 18-anyos na dalaga nang barilin ng hindi nakilalang suspek habang nakaupo sa isang iskinita sa Tondo, Maynila .

Dead on the spot ang biktimang si Mary Rose Segaya, nakatira sa Unit 5, Bldg. 27, Temporary Housing Aroma, Tondo.

Sa imbestigasyon ni PO2 Aldeen Legaspi, ng Manila Police District-Homicide Section, pasado alas-singko kahapon ng mangyari ang pamamaril sa biktima habang nakaupo sa pagitan ng iskinita ng Bldg.11 at 15 sa nasabing lugar.

Nakaupo lamang umano ang biktima sa lugar nang dumating ang hindi nakilalang suspek at agad pinaputukan si Segaya sa ulo na agaran nitong ikinamatay.

Wala namang makapagbigay ng anumang impormasyon sa lugar hinggil sa insidente.

Patuloy ang imbestigasyon sa insidente at inaalam pa ang pagkakilanlan ng salarin gayundin ang motibo sa pamamaslang sa biktima. JOCELYN TABANGCURA-DOMENDEN